အဘယမင်းသားအား မြတ်စွာဘုရားက အောက်ပါအတိုင်း မိန့်ကြား၏။ “မင်းသား၊ မဟုတ်မမှန်၊ အကျိုးစီးပွားနှင့်မစပ်၊ သူတစ်ပါးတို့လဲ မနှစ်သက်။ ထိုစကားမျိုးကို မြတ်စွာဘုရားသည် မပြောမဆို။ ဟုတ်မှန်၏။ အကျိုးစီးပွားနှင့်ကားမစပ်။ သူတစ်ပါးတို့လဲ မနှစ်သက်။ ထိုစကားမျိုးကို မြတ်စွာဘုရား သည် မပြောမဆို။ ဟုတ်မှန်၏။ အကျိုးစီးပွားနှင့်လဲစပ်၏။ သူတစ်ပါးတို့ကား မနှစ်သက်။
ထိုစကားမျိုးကို မြတ်စွာဘုရားသည် အခါအားလျော်စွာ ပြောဆို၏။ မဟုတ်မမှန်။ အကျိုးစီးပွားနှင့် မစပ်။ သူတစ်ပါးတို့ကားနှစ်သက်၏။ ထိုစကားမျိုးကို မြတ်စွာဘုရားသည် မပြောမဆို။ ဟုတ်မှန်၏။ အကျိုးစီးပွားနှင့်မစပ်။ သူတစ်ပါးတို့ကား နှစ်သက်၏။ ထိုစကားမျိုးကို မြတ်စွာဘုရားသည် မပြောမဆို။ ဟုတ်မှန်၏။ အကျိုးစီးပွားနှင့် စပ်၏။ သူတစ်ပါးတို့လဲ နှစ်သက်၏။ ထိုစကားမျိုးကို မြတ်စွာဘုရားသည် အခါအားလျော်စွာ ပြောဆို၏။
(မဇ္ဈိမနိကာယ်၊ မဇ္ဈိမပဏ္ဏာသ၊ အဘယရာဇကုမာရသုတ်)
နေ့စဉ်နှင့်အမျှ လူတို့သည် ကြံတွေးနေကြသည်။ ပြုမူလုပ်ကိုင်နေကြသည်။ ပြောဆိုနေကြသည်။ ကာယကံ ဝစီကံ မနောကံဟူသော ကံသုံးပါရှိရာတွင် ဝစီကံမှုသည် အပြုအများဆုံးသော ကံဖြစ်ပါသည်။ နံနက်အိပ်ရာမှ နိုးထသည်နှင့် ညအိပ်ရာဝင်ချိန် တစ်နေ့တာကာလအတွင်း ပြောခဲ့သော စကားတို့ကား မနည်းလှပေ။ ထိုစကားတို့တွင် သတိယှဉ်၍ ပြောခဲ့သော စကားတွေလည်းပါမည်။ လိုအပ်ချက်အရ ပြောသော စကားတွေလည်း ပါမည်။ သတိလက်လွှတ်ပြီးပြောခဲ့သော စကားတွေလည်းပါမည်။ လိုအပ်ချက်အရ ပြောသော စကားတွေလည်း ပါမည်။ တည်တည်ကြည်ကြည်လေးလေးနက်နက်ပြောသော စကားတွေ လည်းပါမည်။ ပေါ့ပေါ့တန်တန် ပြောသော စကားတွေလည်းပါမည်။ မှန်မှန်ကန်ကန် ပြောသော စကားတွေလည်းပါမည်။ လိမ်ညာပြောမိသော စကားတွေလည်းပါမည်။ အကျိုးစီးပွား ရှိစေသော စကားတို့လည်း ပါမည်။ အကျိုးစီးပွား မဲ့စေသော စကားတို့လည်း ပါမည်။ မေတ္တာကရုဏာအရင်းခံလျက် ပြောသော စကားတွေလည်း ပါမည်။ မနာလိုဝန်တိုမှုနှင့် မုန်းတီးမှု အရင်းခံလျက် ပြောသော စကားတွေလည်း ပါမည်။
လောဘဒေါသ အရင်းခံလျက် ပြောသော စကားတွေလည်း ပါမည်။ မုဒိတာအရင်းခံလျက် ပြောသော စကားတွေလည်း ပါမည်။ ကြမ်းကြမ်းတမ်းတမ်း ပြောသော စကားတွေလည်း ပါမည်။ နူးနူးညံ့ညံ့ ချိုချိုသာသာ ပြောသော စကားတွေလည်း ပါမည်။ နှလုံးသားမှ လာသော ခံစားချက်ကို အရင်းခံလျက် ပွင့်လင်းစွာ ပြောသော စကားတွေလည်းပါမည်။ နှလုံးသားမှ မြစ်ဖျားခံမလာမူလျက်၊
နှုတ်ဖျားတွင်သာပေါ့ပေါ့လျှံလျှံ ပြောသော စကားတွေလည်း ပါမည်။
စိတ်ကောင်း စေတနာကောင်းဖြင့် ပြောသော စကားတွေလည်း ပါမည်။ မကောင်းသော စိတ်စေတန်ဖြင့် ပြောသော စကားတွေလည်း ပါမည်။ ကြားရသူတို့အဖို့ နှလုံးစိတ်ဝမ်း ချမ်းသာစေသော စကားတို့လည်း ပါမည်။ ကြားရသူတို့အဖို့ နှလုံးစိတ်ဝမ်း မချမ်းမြေ့ စေသော စကားတွေလည်း ပါမည်။ အဂတိတရားလေးပါး ကင်းရှင်းစွာ သစ္စာထိုက်သော စကားတွေလည်း ပါမည်။ အဂတိတရား လေးပါးနှင့် ယှဉ်၍ သစ္စာပျက်ယွင်းသော စကားတွေလည်း ပါမည်။ ရိုးရှင်း ဖြောင့်မတ်စွာ ပြောသော စကားတွေလည်း ပါမည်။ ပရိယာယ်ေ၀၀ုစ်ဖြင့် ကောက်ကျစ်သော စကားတွေလည်း ပါမည်။
တစ်ဖက်သူအပေါ် တန်ဖိုးထားလျက် လေးလေးစားစား ပြောသော စကားတွေလည်း ပါမည်။ တစ်ဖက်သူအပေါ် အပေါ်စီးက နှိမ့်နှိမ့်ချချ မောက်မောက်မာမာ ပြောသော စကားတွေလည်း ပါမည်။ လူအမျိုးမျိုး စိတ်အထွေထွေ ရှိသလို စကားတွေလည်း အမျိုးမျိုး ရှိနိုင်သည်။ ယေဘုယျအားဖြင့်မူ လူအများစုသည် ကံသုံးပါးအနက်၊ ဝစီကံကို အရေးကြီးသော ကံဟု အသိအမှတ်မပြုတတ်ကြ။ ဝစီကံနှင့် ပတ်သက်လျှင် ပေါ့ပေါ့ဆဆ သဘော ထားတတ်ကြပါသည်။ ထို့ကြောင့်လည်း ချမ်းမြေ့ရိပ်သာ ဆရာတော်ကြီး အရှင်ဇနကာဘိဝံသက “ကာယကံ ၀စီကံ မနောကံ သုံးခုအနက်က ၀စီကံဆိုတဲ့ နှုတ်ပြောဟာ မဆင်မခြင် လွှတ်ခနဲ လွှတ်ခနဲ ထွက်ထွက်သွားတတ်လို့ သတိထားဖို့ အရေးကြီးပါတယ်” ဟု သတိ ပေးတော်မူခဲ့ခြင်း ဖြစ်ပါသည်။ မြတ်စွာဘုရားက သုစရိုက်တရား ဆယ်ပါးကို ဟောကြားတော်မူရာ၌ ကာယသုစရိုက်နှင့် မနောသုစရိုက်တို့က သုံးပါးစီသာ ပါဝင်ပြီး ၀စီသုစရိုက်က လေးပါးပါဝင်သည်။ ထို့အတူ ဒုစရိုက်တရား ဆယ်ပါးကို ဟောကြားတော်မူရာ၌ ကာယဒုစရိုက်နှင့် မနောဒုစရိုက်တို့က သုံးပါးစီသာပါဝင်ပြီး ၀စီဒုစရိုက်က လေးပါး ပါဝင်ပါသည်။
ဤအချက်ကို လေးလေးနက်နက် သက်ဝင်ဆင်ခြင်လျက် ၀စီကံမှုကို ပေါ့ပေါ့တန်တန် မပြုသင့်။ လွယ်လွယ်မပြုသင့်။ လက်လွှတ်စပယ် မပြုသင့်။ ၀စီကံမှုကို အလေးအနက် ထားလျက် သတိယှဉ်၍ ဆင်ဆင်ခြင်ခြင် ပြုသင့်သည်။ ထိန်းထိန်းသိမ်းသိမ်း ပြုသင့်သည်။ လူအမျိုးမျိုး စိတ်အထွေထွေမှ ပေါ်ထွက်လာသော စကားများ မည်မျှ များပြားနေစေ အထက်ပါ အဆုံးအမတော်အရ မြတ်စွာဘုရားက စကားခြောက်မျိုးသာ ခွဲခြားတော်မူခဲ့ပါသည်။ ထိုခြောက်မျိုးတွင် ပါဝင်သော စကား၏ အင်္ဂါရပ်များမှာ-
(၁) ဟုတ်မှန်ခြင်း၊
(၂) မဟုတ်မှန်ခြင်း၊
(၃) အကျိုးစီးပွား ဖြစ်ထွန်းစေခြင်း၊
(၄) အကျိုးစီးပွားမဲ့စေခြင်း၊
(၅) သူတစ်ပါးတို့ နှစ်သက်ခြင်း၊
(၆) သူတစ်ပါးတို့ မနှစ်သက်ခြင်း တို့ဖြစ်ပါ၏။
အထက်ပါ အင်္ဂါရပ်များတွင် “ အကျိုးစီးပွားနှင့် စပ်ခြင်း” ဟူသော အချက်ကို မြတ်စွာဘုရားရှင် နှစ်သက်တော် မူပါသည်။ တန်ဖိုးထားတော်မူပါသည်။ အဘယ့်ကြောင့်ဟူမူ မြတ်စွာဘုရား ပြောဆိုတော်မူသော စကားနှစ်မျိုးစလုံး၌ အကျိုးစီးပွားနှင့် စပ်ခြင်း ဟူသော အင်္ဂါရပ်ပါဝင်ပြီး မြတ်စွာဘုရား မပြောမဆို တော်မူသော စကားလေးမျိုး စလုံးတွင် “ အကျိုးစီးပွားနှင့် မစပ်ခြင်း” ဟူသော အချက် ပါဝင် နေသောကြောင့် ဖြစ်ပါသည်။
သို့ဖြစ်၍ မိမိပြောလိုက်သော စကားသည် မိမိနှင့်သူတစ်ပါး အကျိုးရှိစေမည့် စကားဟုတ်၏၊ မဟုတ်၏ ဟူသည်ကို ကြိုတင် စိစစ်သင့်သည်။ အချို့စကားတို့သည် မိမိရော သူတစ်ပါးကိုပါ အကျိုးကျေးဇူး ဖြစ်ထွန်းစေ၏။ ထိုစကားမျိုးကို ပြောအပ်ပါ၏။ အချို့စကားတို့သည် မိမိရော သူတစ်ပါးကိုပါ အကျိုးမဲ့ကို ဖြစ်ထွန်းစေ၏။ ထိုစကားမျိုး မပြောအပ်ပါ။ အချို့စကားတို့သည် မိမိ၏ အကျိုးစီးပွားကို မထိခိုက်စေသော်လည်း သူတစ်ပါး အကျိုးစီးပွားကို ထိခိုက်စေ၏။ ထိုစကားမျိုးကို မပြောသင့်ပါ။ ဤသည်နှင့် စပ်လျဉ်း၍ ချမ်းမြေ့ရိပ်သာ ဆရာတော်ကြီး အရှင်ဇနကာဘိဝံသ၏ ဆောင်ပုဒ်မှာ နှလုံးသွင်း လိုက်နာဖွယ် ကောင်းလှပါ၏။
ထိုဆောင်ပုဒ်မှာ အောက်ပါအတိုင်း ဖြစ်ပါ၏။ ပြောမည်ကြံလဲ သင့်စိတ်ထဲ အမြဲဆင်ခြင်ပါ။ မိမိသူတစ်ပါး နှစ်ဦးသား ဘယ်သူများ ထိမည်လဲ။ ထိခိုက်နိုင်ငြား အပြောများ မမှားရှောင်ကြဉ်ပါ။ ပြောဆဲမှာလဲ သင့်စိတ်ထဲ အမြဲဆင်ခြင်ပါ။ ပြောလိုက်သော စကားသည် ပြောသူ၏ အကျိုးကိုလည်း ဖြစ်ထွန်းစေမည်။ အခြားသူတို့၏ အကျိုးကိုလည်း ဖြစ်ထွန်း စေမည် ဆိုလျှင် ယင်းစကားသည် “ အကျိုးစီးပွားနှင့် စပ်သော စကား” ဖြစ်သည်။
မြတ်စွာဘုရားနှစ်လိုသော စကားဖြစ်ပါသည်။ ယေဘုယျအားဖြင့်မူ နှိုင်းနှိုင်းချိန်ချိန်ဖြင့် မေတ္တာ စေတနာ ကရုဏာ မုဒိတာ အရင်းခံလျက် ပြောသော စကားတို့သည် အကျိုးစီးပွားနှင့် စပ်သော စကားဖြစ်ပါ၏။ သူတစ်ပါးအကျိုးကို လိုလားသော နှလုံးသားမှ ဖြစ်ဖျားခံလာသော စကား၌ အကျိုးစီးပွားနှင့် စပ်သော ဂုဏ်ရည်ထွန်းပပါ၏။ ထို့ပြင် အသိဉာဏ်ဆင်ခြင်တုံတရား အရင်းခံလျက် ပြောသော စကား၌လည်း အကျိုးစီးပွားနှင့် စပ်သော ဂုဏ်ရည် တည်ကိန်းပါ၏။ စကားတစ်ခွန်းတွင် အကျိုးစီးပွားနှင့် စပ်သော ဂုဏ်အင်္ဂါပြည့်စုံစေရန် ပြောသူ၏
နှလုံးသား ဖြူစင်လှပဖို့ လိုသည်။ တွေးခေါ်ဆင်ခြင်နိုင်သော အသိဉာဏ်လည်း ရှိဖို့လိုသည်။ မြတ်စွာဘုရားသည် “အကျိုးစီးပွားနှင့် စပ်ခြင်း” ဟူသော အချက်အပြင် “မှန်ကန်ခြင်း” ကိုလည်း နှစ်သက်တော်မူသည်။ ပဇာကြောင့်ဟူမူ မြတ်စွာဘုရား ပြောတော်မူသော စကားနှစ်မျိုးစလုံးတွင် “ဟုတ်မှန်ခြင်း” ဟူသော အချက် ပါဝင်သောကြောင့် ဖြစ်ပါ၏။လူသားတို့ နိစ္စဓူဝ ကျင့်သုံး ဆောက်တည်ရမည့် “ငါးပါးသီလ” တွင် မုသားစကားကို ရှောင်ကြဉ်ခြင်း ဟူသော အချက် ပါဝင်နေခြင်းကို ထောက်ရှုလျက် မှန်ကန်စွာ ပြောဆိုခြင်းကို မြတ်စွာဘုရား မည်မျှ အလေးအနက် သဘောထားတော်မူကြောင်း ထင်ထင် လင်းလင်းသိမြင်နိုင်ပါသည်။
စင်စစ် ၀စီကံဟူသည် လူ့အဖွဲ့အစည်းတွင် အရေးကြီးသော ကံအမှုဖြစ်ပါ၏။ လူတစ်ဦးနှင့် တစ်ဦး ဆက်ဆံရာတွင် မှန်တာကို ပြောဖို့လိုပါသည်။ မှန်တာကို ပြောမှ ကြားနာရသူက မှန်တာကို သိမည်။ မှန်တာကို သိမှလည်း ယင်းအသိအမှန်အပေါ် တည်မှီ၍ ဆောင်ရွက်သင့် ဆောင်ရွက် ထိုက်သည် တို့ကို အကျိုးရှိစွာ ဆောင်ရွက် နိုင်ပါလိမ့်မည်။ အမှားကို ပြောလိုက်သော် ကြားနာရသူက အမှားတွေကို သိမည်။ အမှားသိ အပေါ် အခြေခံလျက် အမှားတွေကို ဆောင်ရွက်တတ်သည်။ မုသာဝါဒမှ ပေါက်ဖွားလာသော အသိမှား အချက်အလက်မှားသည် အကျိုးမဲ့ကိုသာ ဖြစ်ပေါ် စေပါလိမ့်မည်။ ကျေးဇူးရှင် ကမ္ဘာအေးတောင်ပုကု ဆရာတော်ကြီးက လိမ်ညာပြောခြင်းနှင့် ပတ်သက်၍ ဤသို့မိန့်တော်မူခဲ့ပါသည်။ " လိမ်ညာခြင်းသည် လှည့်ပတ်ခြင်းပင် ဖြစ်ပါသည်။ လှည့်ပတ်ရာတွင် ဖြစ်ဆဲ အကြောင်း၊ ဖြစ်ပြီး အကြောင်း၊ ဖြစ်မည့် အကြောင်းများကို လှည့်ပတ်တတ်ရာ မည်သည့်အကြောင်းပြ၍ လှည့်ပတ်သည် ဖြစ်စေ၊ လိမ်ညာခြင်းပင် ဖြစ်ပါသည်။ ယင်းသို့သော လိမ်ညာခြင်းမျိုးဖြင့် လိမ်ညာခံရ၍ လူမှုရေးဆိုင်ရာ ကိုယ်ကျင့်တရားများ ပျက်ပြားကာ နောင်တကြီးစွာ ဖြစ်ပေါ် တိုးတက်လာရသော ဆင်းရဲသည် ကမ္ဘာ စောင့်ငါးပါးတွင် မုသာဝါဒကံ မလုံခြုံမှုကြောင့် ဖြစ်သည်ဟု ငါတို့ ယုံကြည်ပါသည်။
”သို့ဖြစ်၍ လူပုဂ္ဂိုလ်နှင့် ပတ်သက်၍ ဖြစ်စေ၊ လုပ်ငန်းကိစ္စနှင့် ပတ်သက်၍ ဖြစ်စေ သတင်းအချက်အလက်များနှင့် ပတ်သက်၍ ဖြစ်စေ၊ အမှန်ကိုသာ တည်တည်ကြည်ကြည် ပြောဆိုသင့်သည်။ မိမိအကြောင်းကိုပြောလျှင် အမှန်ပြောသင့်သလို သူတစ်ပါးအကြောင်း ပြောလျှင်လည်း အမှန်ကိုသာ ပြောသင့်သည်။ မိမိက ချစ်သူခင်သူ အကြောင်းပြောလျှင် အမှန်ကိုသာ ပြောသလို မိမိက မုန်းတီးသူ အကြောင်း ပြောလျှင်လည်း အမှန်ကိုသာ ပြောဆိုသင့်သည်။ နှလုံးသား ဖြောင့်မတ်သူတို့ကမူ မည်သည့်ကိစ္စ၌မဆို အရှိကိုအရှိအတိုင်းသာ ပြောလေ့ရှိပါသည်။ အမှန်ဖြစ်၊ အမှန်ရှိထက် ထိမ်ချန်၍လည်း မပြောတတ်၊ ပိုပိုမိုမိုလည်း မပြောတတ်၊ ဤသည်နှင့် စပ်လျဉ်း၍ ကျေးဇူးရှင် မဟာစည်ဆရာတော်ကြီး၏ မိန့်တော်မူချက်မှာ များစွာ မှတ်သားအပ်ပါ၏။ “လူပဲဖြစ်ဖြစ် ရဟန်းပဲဖြစ်ဖြစ် ပကတိ ရိုးသားဖြောင့်မတ်တဲ့ ပုဂ္ဂိုလ်ကတော့ ဟုတ်သလောက်သာ ရိုးသားစွာ ပြောလေ့ရှိတယ်။ အပိုအမိုပုံကြီးချဲ့ပြီးတော့ ဝါကြွားပြောလေ့မရှိပါဘူး။
" မှန်သော စကားကို ဆိုသော နှုတ်၌ ဂုဏ်သိက္ခာတည်ကိန်းသည် အခြားသူတို့၏ ယုံကြည့်မှုကို ရယူနိုင်သည်။ သို့သော် မှန်တာကို ပြောရာတွင် စေတနာကောင်း အရင်းခံဖို့ လိုပါမည်။ အသိဉာဏ်နှင့် ယှဉ်ဖို့လဲ လိုပါမည်။
မိမိပြောသော စကားသည် မှန်ပင်မှန်သော်လည်း ပြောလိုက်ခြင်းအားဖြင့် မိမိနှင့်သူတစ်ပါးတွင် အကျိုးကျေးဇူး တစ်စုံတစ်ရာ ဖြစ်ထွန်းနိုင်ခြင်းရှိမရှိ ကြိုတင် ဆင်ခြင် သုံးသပ် သင့်ပါသည်။ အကြောင်းကိစ္စ တစ်ရပ်သည် မှန်ကန်သော်လည်း ထိုအချက်ကို ထုတ်ဖော်ခြင်းအားဖြင့် အကျိုးမဲ့ကိုသာ ဖြစ်စေမည် ဆိုလျှင် ထိုစကားမျိုးကို မပြောသင့်ပါ။ ဥပမာအားဖြင့် ရောဂါဝေဒနာ ကျွမ်းနေသောကြောင့် အလွန်ဆုံး ခြောက်လလောက်သာ
နေရတော့မည် ဟူသော ဆရာဝန်၏ လျှို့ဝှက်စကားကို မှန်ပင်မှန်စေကာမူ ကာယကံရှင် လူနာအား ဖွင့်ဟ မပြောသင့်ပေ။ ထိုစကားမျိုးကြားရသော လူနာအနေဖြင့် စိတ်ဓာတ်အကြီးအကျယ် ထိခိုက်ကျဆင်းကာ ရုပ်ပိုင်းဆိုင်ရာ ဝေဒနာကိုပါမက စိတ်ဝေဒနာ၏ တိုက်ခိုက်ခြင်းကိုပါ ခံရပေလိမ့်မည်။ ထိုအခါ ဆရာဝန် ခန့်မှန်းသည်ထက်ပင် အသက်ပို၍ တိုဖွယ်ရာသာ ရှိတော့သည်။ ထို့ကြောင့် ဘုရားရှင်က ဟုတ်မှန်၍ သူတစ်ပါး နှစ်သက်သော်လည်း အကျိုးစီးပွားနှင့် မစပ်သော စကားကို ပြောတော်မမူခြင်း
ဖြစ်ပါသည်။ မြတ်စွာဘုရားသည် စကားခြောက်မျိုးအနက် စကားနှစ်မျိုးကိုသာ ပြောဆိုတော်မူရာ ယင်းမှာ လူတို့အတွက် “ စကားပြောနည်း လမ်းညွှန်” ဟုဆိုနိုင်ပါသည်။ ထိုစကားပြောနည်း လမ်းညွှန်အတိုင်း ကျင့်သုံးလိုက်နာနိုင်သော် ဝစီကံ သန့်ရှင်းစင်ကြယ်မှု ဖြစ်ပွားကာ ကောင်းသော ဝစီကံမှုမှ သယ်ဆောင်လာသော လက်ဆောင်ကောင်းများ ဘဝတွင် ဖူးပွင့်ဝေဆာ လာပေလိမ့်မည်။ ။
by ဟင်းလေးအိုး
