လောကဓံဆိုတာ

လောကဓံဆိုတာ

လောကဓံဆိုတာ လောကဓမ္မဆိုတဲ့ ပါဠိမှ ဖြစ်လာတဲ့ အမည်ဖြစ်တယ်။ လောကဆိုတာ သတ္တလောက၊ သင်္ခါရလောက၊ သြကာသလောကအားဖြင့်သုံးမျိုးရှိတယ်။ သတ္တလောကဆိုတာ သတ္တ၀ါ အပေါင်းကို ခေါ်တာပဲ၊ သတ္တ၀ါ တစ်ယောက် တစ်ယောက်ဟာ လောကတစ်ခုပါပဲ။ လူတစ်ယောက်ဟာ လောကတစ်ခုပဲ။ နတ်တစ်ယောက်လည်း လောကတစ်ခုပဲ။ မိန်းမ တစ်ယောက်လည်း လောကတစ်ခုပဲ။ ယောကျာ်းတစ်ယောက်လည်း လောကတစ်ခုပဲ။ ကျွဲ၊ နွား အစရှိတဲ့ တိရစ္ဆာန်တွေလည်း တစ်ကောင်တစ်ကောင်ဟာ လောကတစ်ခု တစ်ခုပဲ။ အတိုချုပ် အားဖြင့် သတ္တ၀ါတစ်ကောင် တစ်ကောင်ဟာ လောကတစ်ခု တစ်ခုပဲ။ သတ္တ၀ါတွေ အားလုံး ကိုလည်း ပေါင်းပြီး သတ္တလောကလို့ ခေါ်တယ်။

သြကာသလောကဆိုတာကတော့ အဲဒီသတ္တ၀ါတို့ရဲ့ တည်နေရာဌာနတွေပါပဲ။ လူ့ဘုံ၊ နတ်ဘုံ၊ ဗြဟ္မာဘုံဆိုတဲ့ တည်ရာဌာနတွေပါပဲ။ ငရဲ၊ တိရစ္ဆာန်၊ ပြိတ္တာ၊ အပါယ်သတ္တ၀ါတို့၏ တည်ရာ ဌာနတွေကလည်း သြကာသလောကပဲ။ ဒါပေမယ့် တိရစ္ဆာန်၊ ပြိတ္တာတို့ရဲ့ တည်ရာဌာနကတော့ လူတို့၏တည်ရာ မြေကြီးပေါ်မှာပဲ ရှိနေပါတယ်။ တစ်သီးတစ်ခြားရယ်လို့တော့ မရှိဘူး။ ဒါပေမယ့် သူတို့ရဲ့ တည်နေရာဟာ သူတို့ရဲ့ သြကာသလောကပေါ့။

သင်္ခါရလောကဆိုတာကတော့ ရုပ်-နာမ်-သင်္ခါရ တရားအပေါင်းပါပဲ။ သတ္တ၀ါတွေရဲ့ သန္တာန်က ရုပ်-နာမ်-သင်္ခါရ တရားတွေလည်း သင်္ခါရလောကပဲ၊ သတ္တ၀ါတို့၏ တည်ရာမြေကြီး၊ သစ်ပင်၊ တော၊ တောင်၊ ဘုံဗိမာန်၊ ရေ၊ လေ၊ မီးစသည် ဗဟိဒ္ဓ သန္တာန်က ရုပ်တရားတွေလည်း သင်္ခါရလောကပဲ။ အတိုချုပ်အားဖြင့် သက်ရှိ၊ သက်မဲ့၊ ရုပ်-နာမ် တရားဟူသမျှဟာ သင်္ခါရလောက ချည်းပါပဲ။

ယခုဟောမည့် လောကဓမ္မပုဒ်မှာပါဝင်တဲ့ လောကဆိုတာကတော့ အဲဒီ လောကသုံးပါးထဲက သတ္တလောကကိုသာ ဆိုလိုပါတယ်။ ဒါကြောင့် လောကဆိုတာက သတ္တ၀ါတွေ၊ ဓမ္မဆိုတာက တရား၊ လောကဓမ္မဆိုတာ သတ္တ၀ါတွေမှာ မလွဲမရှောင်သာဘဲ အမြဲတွေ့ထိ ခံစားနေကြရတဲ့ တရားတွေပါပဲ။ အဲဒီ လောကဓမ္မခေါ်တဲ့ လောကဓံတရားကို မြတ်စွာဘုရားက အကျဉ်း၊ အကျယ် သုတ်၂-ခုအဖြစ်နဲ့ ဟောတော်မူခဲ့ပါတယ်။

လောကဓံတရား ၈-ပါး

ကတမေအဋ္ဌ၊ လာဘော စ အလာဘော စ ယသော စ အယသော စ နိန္ဒာ စ ပသံသာ စ သုခဉ္စ ဒုက္ခဉ္စ။

လာဘော စ - လာဘ်ရခြင်းက တစ်ပါး၊ အလာဘောစ - လာဘ်မရခြင်းက တစ်ပါး၊ ယသောစ - အခြွေအရံများခြင်းက တစ်ပါး၊ အယသောစ - အခြွေအရံမဲ့ခြင်းက တစ်ပါး၊ နိန္ဒာစ - ကဲ့ရဲ့ခြင်း၊ အကဲ့ရဲ့ခံရခြင်းက တစ်ပါးး၊ ပ-သံသာစ-ချီးမွမ်းခြင်း၊ အချီးမွမ်းခံရခြင်းက တစ်ပါး၊ သုခဉ္စ ချမ်းသာခြင်းက တစ်ပါး၊ ဒုက္ခဉ္စ-ဆင်းရဲခြင်းက တစ်ပါး။

ဒီရှစ်ပါးထဲမှာ အကောင်းက ၄-ပါးပါတယ်။ အဆိုးကလည်း ၄-ပါးပါတယ်။  အကောင်းနဲ့တွေ့ရင် အဆိုးလည်းပါလာတယ် တစ်ခါတစ်ရံ ရချင်တာတွေကိုရမယ်။ အလိုရှိတိုင်းရပြီး ပြည့်စုံ ကြွယ်ဝနေမယ်။ 

တစ်ခါတစ်ရံကျတော့ ရချင်တာတွေကိုမရဘဲ ရှိနေမယ်။ တစ်ခါတစ်ရံကျတော့ ရချင်တာတွေကို မရဘဲ ရှိနေမယ်။ ရပြီးသားတွေလည်း ပျက်စီးဆုံးရှုံး သွားမယ်။ တစ်သက်လုံး မပျက်စီးဘဲ တည်နေတယ်ဆိုတောင်မှ သေတဲ့အခါကျတော့ အဲဒီရထားတာတွေကိုစွန့်ပြီး သွားရမယ်။ ဒီတော့ အကြောင်းညီညွတ်လို့ လာဘဆိုတဲ့ ရခြင်းနဲ့ပြည့်စုံလျှင်၊ အလာဘ မရခြင်း၊ ရပြီးသားတွေ ပျက်စီးဆုံးရှုံးခြင်း ဆိုတာကလည်း တစ်ပါတည်းနောက်က လိုက်ပါလာတော့တာပဲ။

တစ်ခါတစ်ရံ အခြွေအရံနဲ့ ပြည့်စုံမယ်။ တစ်ခါတစ်ရံ ကျတော့ အခြွေအရံနဲ့ မပြည့်စုံဘဲရှိနေမယ်။ အင်မတန် အခြွေအရံများတဲ့ မြတ်စွာဘုရားတောင်မှ တစ်ပါးတည်း ၀ါကပ်နေရတဲ့အခါ ရှိသေးတာပဲ။ သာမန်လူတွေမှာတော့ ရှိသမျှ အခြွေအရံတွေကို အကုန်လုံးစွန့်ပြီး တစ်ယောက်တည်း ကံအားလျော်စွာ သွားရမယ်။ ဒီတော့ ယသဆိုတဲ့ အခြွေအရံနဲ့ ပြည့်စုံလျှင် အယသ ဆိုတဲ့ အခြွေအရံမဲ့ခြင်းကလည်း တစ်ပါတည်းနောက်က လိုက်ပါလာတော့တာပဲ။

ချီးမွမ်းတဲ့ဂုဏ်နဲ့ ပြည့်စုံတဲ့အတွက် အချီးမွမ်းခံရတဲ့ အခါလည်းရှိမှာပဲ။ ဒါပေမယ့် ချီးမွမ်းဖွယ် ဂုဏ်နဲ့ပြည့်စုံအောင် အားထုတ်ရတာက လွယ်တာမဟုတ်ဘူး။ အင်မတန် အားထုတ်နိုင်မှ တကယ်အစစ် ချီးမွမ်းဖွယ်ဂုဏ်တစ်ခုကို ရပါတယ်။ အဲဒါထက် အဲဒီချီးမွမ်းဖွယ်ဂုဏ်မပျက်အောင် စောင့်ရှောက်နေရတာက သာပြီးဝန်လေးပါတယ်။ 

ဒီလို စောင့်ရှောက်နေနိုင်ပေမယ့် သူတစ်ပါးက အထင်လွဲလို့ဖြစ်စေ၊ သက်သက်မုန်းလို့ဖြစ်စေ၊ အခြားအကြောင်းကြောင့်ဖြစ်စေ၊ အကဲ့ရဲ့ခံရတာလည်း ရှိတတ်သေးတယ်။ အပြစ်ဒေါသ လုံးဝ ကင်းစင်တော်မူတဲ့ မြတ်စွာဘုရားကိုတောင်မှ ကဲ့ရဲ့သူတွေ ရှိသေးတာပဲ။ သာမန် လူတွေမှာတော့ အထူးပြောစရာမလိုပါဘူး။ ဒီတော့ အချီးမွမ်းခံရတယ်ဆိုရင် မလိုလားတဲ့သူတွေက ဖန်တီးတဲ့ ကဲ့ရဲ့မှုကလည်း လိုက်ပါလာတတ်ပါတယ်။

သုခနဲ့-ဒုက္ခဆိုတာကတော့ အမြဲမပြတ် ဒွန်တွဲနေပါတယ်။ အကြောင်းညီညွတ်တဲ့အခါ ကိုယ်ရော စိတ်ပါ ချမ်းသာနေမယ် အကြောင်းမညီညွတ်တဲ့အခါ ဆင်းရဲနေမယ်။ လမ်းလျှောက်နေတဲ့အခါ ခြေတစ်ဖက်က မြေကြီးပေါ်မှာ ရပ်တည်နေသလိုပဲ။ ညာဘက်ခြေက ကြွလှမ်းနေတဲ့အခါမှာ ဘယ်ဘက်က မြေပေါ်မှာ ရပ်တည်နေမယ်။ ဘယ်ဘက်ခြေက ကြွလှမ်းနေတဲ့အခါမှာ ညာဘက်ခြေက ရပ်တည်နေမယ်။

အဲဒါလိုပဲ ချမ်းသာဆိုတဲ့ အကောင်းတွေဖြစ်ပေါ်နေတဲ့အခါမှာ ဆင်းရဲငြိမ်းနေတယ်၊ ဆင်းရဲဆိုတဲ့ မကောင်းတာတွေ ဖြစ်နေတဲ့အခါမှာ ချမ်းသာမရှိဘူး။ တစ်လှည့်စီ၊ တစ်ပြန်စီ တွေ့ကြုံနေရတဲ့ တရားတွေပဲ။ ဒီတော့ ချမ်းသာနေတယ်ဆိုရင် ဆင်းရဲဆိုတာကလည်း တပါတည်းနောက်က လိုက်ပါလာတာပဲ။

အဲဒီလို အကြောင်းအားလျော်စွာ လူတိုင်းလူတိုင်း တွေ့ကြုံနေရတဲ့ ဒီလောကဓံတရားတွေကို ဉာဏ်ဖြင့် အသင့်အသင့် နှလုံးသွင်းဆင်ခြင်ပြီး သည်းခံနိုင်ဖို့လိုပါတယ်။ 

ဘုရားရဟန္တာ အရှင်မြတ်တွေမှာတော့ ဒီလောကဓံတရားတွေကို သည်းခံတော်မူနိုင်ကြပါတယ်။ ကောင်းတဲ့ လောကဓံ၎-မျိုးနဲ့တွေ့လို့လည်း မတက်ကြွမတုန်လှုပ်ဘူး။ ဆိုးတဲ့ လောကဓံ လေးမျိုးတွေ့လို့လည်းစိတ်မပျက်မတုန်လှုပ်ဘူး။ ဒါကြောင့် မင်္ဂလသုတ်မှာ မြတ်စွာဘုရားက -
ဖုဌဿ လောကဓမ္မေတိ၊ စိတ္တံ ယဿ န ကမ္ပတိ၊ အသောကံ ၀ိရဇံ ခေမံ ဧတ မင်္ဂလ မုတ္တမံ - လို့ ဟောတော်မူပါတယ်။

လောကဓမ္မေဟိ-လောကဓံတရား ရှစ်ပါးတို့နှင့် ဖုဋ္ဌဿ-တွေ့သော-အကြင်ရဟန္တာပုဂ္ဂိုလ်၏-လို့၊ ရဟန္တာပုဂ္ဂိုလ်လည်း ဒီလောကဓံတရားတွေကို တွေ့ရတာပဲ။ 

သူ့အမည်ကိုက လောကဓမ္မ လောကနှင့်ဆိုင်တဲ့ တရားဆိုတော့ လောကထဲအတွင်းဝင်နေရင် ဒီလောကဓံ တရားတွေနဲ့ တွေ့ရတာပဲ။ ရဟန္တာများလည်း ပရိနိဗ္ဗာန်မစံမ၀င်ခင်မှာဆိုရင် လောက ထဲမှာ ပါဝင်နေပါတယ်။ လောကဆိုတဲ့ သူ့နိုင်ငံနယ်ပယ်ထဲမှာ ၀င်နေတော့ လောကဓမ္မဆိုတဲ့ သူ့တရားနဲ့လည်း တွေ့ရတော့တာပဲ။ မြတ်စွာဘုရားလည်း တွေ့ရတာပဲ။ သတ္တလောကဆိုတဲ့ သူ့နယ်ပယ်မှာနေရင် ဘယ်သူမှ မရှောင်နိုင်ဘူး။ တွေ့ရတာချည်းပဲ။ ဒါကြောင့် လောကဓမ္မ၊ ရှောင်မရ၊ မုချတွေ့စမြဲ။ လို့ ဆိုပါတယ်။

ရဟန္တာသာမဟုတ်ဘူး။ အနာဂါမ်ဆိုရင်လည်း တော်တော်သည်းခံနိုင်ပါပြီ။ တုန်လှုပ်ခြင်း မရှိသလောက် ဖြစ်နေပါပြီ။ သောတာပန် သကဒါဂါမ်များမှာတော့ ကာမရာဂမကင်းသေးတဲ့အတွက် လောကဓံအကောင်းတွေနဲ့ တွေ့တဲ့အခါ နှစ်သက်သာယာပြီး ၀မ်းမြောက် တက်ကြွ တန်သလောက်တော့ တက်ကြွပေလိမ့်ဦးမယ်။ ဗျာပါဒ ဒေါသ မကင်းသေးတဲ့အတွက် လောကဓံ အဆိုးတွေနဲ့ တွေ့တဲ့အခါ နှလုံးမသာမှု၊ စိတ်ပျက်မှု၊ ၀မ်းနည်းမှုလည်း ဖြစ်တန်သလောက်တော့ ဖြစ်ပေလိမ့်ဦးမယ်။

ဒါကြောင့် အနာထပိဏ် သူဋ္ဌေးကြီးမှာ သုမနာဒေ၀ီဆိုတဲ့ သမီးငယ် သေဆုံးသွားတာ အကြောင့်ပြုပြီး နှလုံးမသာခြင်း ဖြစ်ရတယ်။ အရှင်အာနန္ဒာမှာလည်း ဘုရားပရိနိဗ္ဗာန်စံခါနီးမှာ ငိုကြွေးမြည်တမ်းခြင်း ဖြစ်ပါတယ်။ ဒါပေမယ့် သောတာပန် သကဒါဂါမ်များမှာ တရားက သိတန်သလောက် သိပြီးဖြစ်နေတဲ့အတွက် တော်တော်တော့ သည်းခံနိုင်နေပါပြီ။ ဖြစ်ပေါ်လာတဲ့ သောကပရိဒေ၀တွေကို ပယ်ဖျောက်ဖို့ရာ လွယ်ကူနေပါပြီ။ ဒါကြောင့် လောကဓံတရားဆိုးတွေနဲ့ တွေ့တဲ့အခါမှာ အားထုတ်ထားတဲ့တရားနဲ့ ဖြေဖျောက်ရတယ်။ ဒီလိုအခါမှာ တရားမှတစ်ပါး အားကိုးစရာ မရှိဘူး။

အကယ်၍ လောကဖက်ကအားထုတ်လို့ လောကဓံအဆိုးမှ လွတ်မြောက်နိုင်တဲ့နည်းလမ်းရှိ သေးရင်တော့ တတ်နိုင်သမျှနည်းမျိုးစုံနဲ့ အားထုတ်ကာကွယ်ရပါတယ်။ အဲဒီလိုလောကဖက်က နည်းလမ်းတွေနဲ့ မကာကွယ်၊ မတားမြစ်နိုင်တော့ဘူး ဆိုတဲ့အခါကျတော့ ကိုယ့်တရားကိုပဲ အားကိုးရတယ်။ ကိုယ့်တရားနဲ့ နှလုံးသွင်းပြီး စိတ်နှလုံးမသာမှုတွေကို ပယ်ဖျောက်ရတယ်။

အယံ မဂ္ဂေါ-ကာယ ဝေဒနာ စိတ္တ ဓမ္မတို့ကို အမှတ်ရမှု-သတိပဋ္ဌာန် ၄-ပါးဟူသော ဤလမ်း ခရီးသည် သောကပရိဒေ၀ါနံ သမတိက္ကမာယ စိုးရိမ်ပူပန်ခြင်း၊ ငိုကြွေးခြင်းတို့ကို လွန်မြောက်ရန် အလို့ငှါ၊ ဧကာယနော မဂ္ဂေါ တစ်ကြောင်းတည်းသောလမ်း တစ်ခုတည်းသော လမ်းပါပေတည်း။ ဒုက္ခဒေါမနဿာနံ အတ္ထင်္ဂမာယ ကိုယ်ဆင်းရဲ စိတ်ဆင်းရဲတို့၏ ချုပ်ငြိမ်းကွယ်ပျောက်ရန် အလို့ငှါ၊ ဧကာယနော မဂ္ဂေါ တစ်ကြောင်းတည်းသောလမ်း တခုတည်းသော လမ်းပါပေတည်းလို့ ဟောထားပါတယ်။

ဒါကြောင့် အမှတ်ရမှု သတိတရားနဲ့ ရှုမှတ်နေတဲ့ အလုပ်ဟာ သောကကင်းဝေး နေနိုင်ရေးဆိုတဲ့ နည်းတွေထဲမှာ အကောင်းဆုံး နည်းပါပဲ၊ ဒီလို ရှုမှတ်နေခြင်းဖြင့် နောက်ဆုံးမှာ အရဟတ္တ မဂ်ဖိုလ်ရောက်ပြီး ဆင်းရဲဟူသမျှမှ လုံးဝလွတ်မြောက်သွားနိုင်ပါတယ်၊ ဒါကြောင့် “ပရိမုစ္စတိ ဒုက္ခသ္မာတိဝဒါမိ ဆင်းရဲဟူသမျှမှ လွတ်မြောက်သည်ဟု ငါဘုရားဧကန်ဟောတော်မူတယ်” လို့ မြတ်စွာဘုရားက ၀န်ခံတော်မူပါတယ်။

ပြည့်ပြည့်စုံစုံတရားအားမထုတ်နိုင်သေးလို့ တရားအားထုတ်မှုဖြင့် မပယ်ဖျောက်နိုင်ဘူးဆိုရင် ယောနိသောမနသိကာနဲ့ အသင့်အတင့် နှလုံးသွင်းပြီး ပယ်ဖျောက်ရတယ်။ လောကဓံတရားဆိုတာ ဘုရားရဟန္တာများတောင်မှ မရှောင်နိုင်ဘူး။ တွေ့ကြသေးတာပဲ။ ငါလိုလူ ဘယ်မှာမတွေ့ဘဲရှိမှာလဲ ဘုရားရဟန္တာ အရှင်မြတ် တွေဟာ ဒီလောကဓံတရားတွေနဲ့ တွေ့တဲ့အခါ မတုန်မလှုပ် သည်းခံတော်မူနိုင်ကြတယ်။ ငါလည်း ဘုရားရဟန္တာများလို သည်းခံမယ်။ စိတ်နှလုံးမသာခြင်းကို မဖြစ်စေရအောင် ဖြစ်ရင်လည်း ကြာရှည်စွာ မဖြစ်ရအောင် စောင့်ရှောက်မယ်။ 

ဒီလိုစောင့်ရှောက်ခြင်းဖြင့် ဘုရားရဟန္တာအရှင်မြတ်တို့၏ ဂုဏ်တစ်စိတ်တစ်ဒေသနှင့် ပြည့်စုံ စေရမယ်၊ စသည်ဖြင့် နှလုံးသွင်းဆင်ခြင်ပြီး နှလုံးမသာမှုကို ပယ်ဖျောက်ရတယ်။ အဲဒီလို ပယ်ဖျောက်နိုင်ဖို့ အရေးကြီးပါတယ်။

လောကထဲမှာနေတဲ့ ပုဂ္ဂိုလ်တွေဆိုရင် ဒီလောကဓံတရားတွေနဲ့ တွေ့ကြတာချည်းပဲ၊ ဘယ်သူမှ မရှောင်နိုင်ဘူး၊ ကံကောင်းတဲ့ သူတွေမှာ ကုသိုလ်ကံက အကျိုးပေးတဲ့အခါ ကောင်းတဲ့လောကဓံ ၄-ပါးနဲ့ တွေ့နေကြရပါတယ်၊ ကံမကောင်းတဲ့သူတွေမှာ အကုသိုလ်ကံက အကျိုးပေးတဲ့အခါ ဆိုးတဲ့လောကဓံ ၄-ပါးနဲ့ တွေ့နေကြရတယ်။

အဲဒီမှာ ကောင်းတဲ့လောကဓံတွေကိုတော့ အများကကြိုက်ကြတယ်။ ဆိုးတဲ့လောကဓံတွေကိုတော့ အလိုမရှိကြဘူး၊ ကြောက်ကြတယ်၊ ရှောင်ပါစေ၊ လွဲပါစေ၊ ဖယ်ပါစေလို့ တောင့်တနေကြတယ်၊ မတွေ့အောင်လည်း ကြိုးစားနေကြပါတယ်၊ ဒါပေမယ့် လုံးလုံးတော့မလွတ်နိုင်ကြပါဘူး၊ တွေ့ကြရ သေးတာပဲ၊ အနည်းနဲ့အများသာ ကွာခြားပါတယ်၊ မြတ်စွာဘုရား ကိုယ်တော်မြတ်ကြီးတောင်မှ နည်းနည်းတော့ တွေ့ရသေးတာပဲ၊ အဲဒါကို ထောက်ဆကြည့်ရင် “ငါတို့လို သာမန်ပုဂ္ဂိုလ်တွေ မတွေ့ရဘဲ နေပါ့မလား” လို့ဆင်ခြင်ပြီး အတော်အတန်တော့ သည်းခံနိုင်စရာ အကြောင်း ရှိပါတယ်။

လောကဓံတရားများနှင့် တွေ့ရသောအခါ ထိုလောကဓံတရားတို့ကြောင့် တုန်လှုပ်ခြင်း မရှိဘဲ သည်းခံနိုင်အောင် နှလုံးသွင်းဆင်ခြင် ရှုမှတ်ပွားများအားထုတ်နိုင်ကြ၍ လောကဓံခပ်သိမ်းတို့၏ ကင်းငြိမ်းရာ နိဗ္ဗာန်ချမ်းသာသို့ လျင်မြန်စွာဆိုက်ရောက်၍ မျက်မှောက်ပြုနိုင်ကြပါစေ။

မေတ္တာဖြင့် -
မဟာစည်ဆရာတော်ဘုရားကြီး၏ လောကဓံတရားတော် မှ ထုတ်နှုတ်ပူဇော်ပါသည်။