အိုခြင်းရဲ့ အလှ (၂)
တစ်နေ့တာဆိုတဲ့ အချိန်ကာလ အတွင်းမှာ အလှဆုံး အချိန်နှစ်ချိန် ရှိပါတယ်။ အရုဏ် ဆည်းဆာချိန်နဲ့ နေညို ဆည်းဆာချိန်တို့ ဖြစ်ပါတယ်။........
ဒါကို အာရှနွယ်ဖွား မြန်မာပြည်သားများ အနေနဲ့ သတိထားမိသူတိုင်း သိသာ ခံစားနိုင်ကြ ပါလိမ့်မယ်။ “အာရှနွယ်ဖွားများ”လို့ ကန့်သတ် ပြောရ တာကတော့ သဘာဝက ပေးအပ်တဲ့ ဒီဆည်းဆာအလှ ခွဲတမ်းကို အာရှသားများကသာ ဝေစုအများဆုံး ရယူခံစားနိုင်ကြလို့ပါ။
အားလုံး အထူးသဖြင့် အင်္ဂလိပ်ဘာသာစကား ပြောကြတဲ့ ဒီကလူတွေ သိကြတဲ့ အတိုင်းပဲ ဥရောပတို့၊ အမေရိကတို့ လို နေရာတွေမှာက ဆည်းဆာ အလှ ခွဲတမ်း ခံစားနိုင်ခွင့် အတော်နည်းပါး ကြပုံရပါတယ်။ ဒါကြောင့်လည်း လူချင်းတွေ့တဲ့အခါမှာ အချိန်အား လျော်စွာ “ကောင်းတဲ့ နံနက်ခင်းဖြစ် ပါစေ၊ ကောင်းတဲ့ ညနေချမ်းဖြစ်ပါစေ” ဆိုပြီး တကူးတက နှုတ်ဆက် ဆုတောင်း ပေးနေကြရတယ် ထင်ပါတယ်။ မြန်မာပြည်မှာကတော့ နံနက် တိုင်းလိုလိုက ကောင်းလွန်းနေတော့ နေ့အခါဆို ကျောကော့ အောင် ပူလွန်းလို့၊ နံနက်ခင်းရောက်ရင် မိုးတိမ်တွေ မြူတွေကင်းတဲ့ နံနက်ခင်းကြီး မဖြစ်ဘဲ တိမ်ထူမိုးရွာတဲ့ နံနက်ခင်းဖြစ်ပါ စေလို့တောင် ဆုတောင်းရမလိုလို ဖြစ်နေကြရတာကိုး။
ဒါကြောင့် ယဉ်ကျေးလိမ္မာ သင်တန်းတွေမှာ ကလေးတွေနဲ့ စကားစပ်မိတဲ့အခါ ရယ်စရာသဘောမျိုးနဲ့ “မင်းတို့က ဘိုဆန်ဆန် မနက်ခင်းလူတွေ့တိုင်း ဂွတ်မောနင်းတွေ လျှောက်လျှောက် လုပ်မနေကြနဲ့။ ဒါက နံနက်ခင်းအလှနဲ့ ကြုံရခဲတဲ့ ဒေသတွေမှာ ဆုတောင်း နှုတ်ဆက်ရတာ။ တို့ဆီမှာက နံနက် တိုင်းနေသာပြီး နေ့ခင်းဆို ပူလွန်းလို့ မိုးရွာတဲ့ နံနက်ခင်းဖြစ်ပါစေ၊ တိမ်ထူတဲ့ နံနက်ခင်းဖြစ် ပါစေ” လို့တောင် ဆုတောင်း ရမလိုကြီး ဖြစ်နေတာဗျ။
ညနေ အလုပ်ဆင်းချိန်လည်း ဒီအတိုင်းပဲ။ သူတို့ဆီမှာ ရာသီဥတု သာယာကြည်လင်တဲ့ ညနေခင်းက အရှားသားကိုး။ တို့ဆီမှာကဒါမျိုး မလိုဘူးလေ။ အဲ လိုင်းကားနဲ့ သွားရ ပြန်ရသူအတွက်တော့ ကားထိုင်ခုံရ ဖို့ ရည်ရွယ်ပြီး “ကောင်းသောညနေ ခင်းဖြစ်ပါစေ” လို့ ဆုတောင်းပေးချင် လည်း ပေးပေါ့။ သူတို့ဆီလို ရာသီဥတုဆိုးဝါးမှုကင်းဖို့တော့ ဆုတောင်း စရာမလိုဘူး။ သဘာဝက အပြည့်အဝ ပေးပြီးသား။
ဒါက သူတို့ဆီထက် တို့ဆီရဲ့ အားသာချက်ပဲ။ အဲ သူတို့ဆီမှာ တို့ဆီထက် အားသာချက် အနေနဲ့ ဆုတောင်းဖို့ မလိုတာကတော့ “ကောင်းသော ညချမ်းပါ”ဆိုတဲ့အချက် ပဲ။ သူတို့ဆီမှာ ဒီအတွက် ဆုတောင်း ဖို့ မလိုအပ်လှဘူး။ မီးမှ မပျက်ဘဲကိုး။ အေး မင်းတို့ ဘိုဆန်ချင်လို့ တကယ်ဆုတောင်း ချင်တယ်ဆိုရင် တို့ဆီမှာ ဆုတောင်းစရာဆိုလို့ (ဂွတ်နိုက်) ကောင်းသော ညချမ်းပါ ဆိုတဲ့ တစ်ခုပဲရှိမယ် ဆိုတဲ့အကြောင်း ပြောပြရသေးတယ်။
ထားပါတော့၊ အာရှသားများ၊ အထူးသဖြင့်တော့ မြန်မာပြည်သားများဟာ ရာသီဥတု၊ ရေမြေ တောတောင်စတဲ့ သဘာဝ လက်ဆောင်တွေ အခြားနိုင်ငံသားများထက် ပိုမို ရရှိကြသူများဖြစ်လို့ နေ့တစ်နေ့ရဲ့ အလှဆုံးနှစ်ချိန်ဆိုတာကို လူတိုင်းလိုလို တွေ့ဖူးကြုံဖူး၊ ခံစားဖူးကြမယ်ထင်ပါတယ်။ တစ်နေ့တာလုံးကို သတိထား အကဲခတ်ကြည့်မယ်ဆိုရင် နံနက်အရုဏ်ဆည်းဆာ သာယာ လှပတဲ့နေ့မှာ နေ့ခင်းချိန်တွေလည်း သာယာကြည်လင် တတ်ပါတယ်။ နေ့ခင်းမှ ကြည်လင်တောက်ပတဲ့ နေ့မှာ ညနေ ဆည်းဆာကလည်း ပိုပြီးလှပလေ့ရှိပါတယ်။
ရှေးလူကြီးများကတော့ နေ့အခါ နေသာတဲ့နေ့တွေရဲ့ ညနေဆည်းဆာ ဟာ တိမ်နီ၊ တိမ်ပြာ၊ တိမ်မိလ္လာ၊ တိမ်ခရမ်း၊ တိမ်မကန်းကွက်တွေပါ ပိုပြီး စုံညီတဲ့အတွက် အရုဏ်ဆည်း ဆာထက်တောင်ပိုပြီး လှတယ်လို့ ယူဆကြပုံရပါတယ်။
ညနေဆည်းဆာဟာ သူကိုယ်တိုင် လှပရုံမကဘူး သူ့ရဲ့အရောင်နဲ့ ထိတွေ့တဲ့အရာဝတ္ထု တိုင်းကိုလည်း သူ့နဂိုရှိပြီးသားထက် အလှ တိုးစေတတ် တာမို့ အတော်အတန် ရွက်ကြမ်း ရေချို အလှမျိုးရှိတဲ့ မိန်းကလေးများကိုတောင် မြင်ရသူ ကာလသားတွေရဲ့ စိတ်ထဲမှာ “ ကောင်းခြင်းငါးဖြာ၊ ကင်းကွာ ခြောက်ပြစ်၊ နတ်အစစ်လား၊ လူပဲ လား” လို့ ခွဲခြားမရနိုင်ဘဲ ဇွတ်အတင်း ဆွဲပြေးချင် စိတ်တွေ ဖြစ်စေတတ်တာကြောင့် “ နေဝင်ရင် တိမ်တောက်တော့ ပျိုကြောက်တဲ့ ဒီအချိန်” ဆိုပြီး မှတ်ချက်ချခဲ့ကြတာပေါ့။
ဒါတွေကို အခု ပူဇော်ပွဲလုပ်နေ ကြတဲ့ လူငယ်တွေက သိချင်မှသိမယ်။ အပူဇော်ခံ မြန်မာပြည်သား ကြီးတွေကတော့သိကြမှာပါ။ နေ့တစ်နေ့မှာ နှစ်ချိန် လှပသလို ဘဝတစ်ခု မှာလည်း အချိန်ကာလနှစ်ခုဟာ တကယ်လှပကြရစမြဲအမှန်ပါ။ ဘဝရဲ့ အရုဏ်ဆည်းဆာလို့ ဆိုရမယ့် ငယ်ရွယ်စဉ်အချိန် ကာလနဲ့ ဘဝရဲ့ နေညိုဆည်းဆာလို့ခေါ်ရမယ့် အခုလို အပူဇော်ခံ အရွယ် ရောက် လာတဲ့အချိန် ကာလနှစ်ခုပေါ့။
ဒီနေ့ ပူဇော်ပွဲပြုလုပ်ကြတဲ့ လူငယ်လူရွယ်တို့ အနေနဲ့ နည်းနည်း ပြန်စဉ်းစားကြည့်ပါ။ ကိုယ့်ဘဝရဲ့ အရုဏ်ဆည်းဆာ အရွယ်ဟာ “လိုတရ” ဆိုရလောက်အောင် တကယ်လှပခဲ့ကြပါတယ်။ လူတိုင်းရဲ့ အရုဏ်ဆည်းဆာ အရွယ်ဆိုတာ တကယ် တွက်ကြည့်ရင် လူဖြစ်ကျိုး အနပ်ဆုံးနဲ့ လူတန်းစား အညီမျှဆုံး အရွယ်လို့တောင် ဆိုနိုင်ပါတယ်။ ဟုတ်တယ်လေ...ဘယ်သူမဆို ငါဟာ ဆင်းရဲသား သားသမီးလား၊ သူဌေးသား သမီးလား၊ အလုပ်သမား သားသမီးလား၊ အရာရှိ သားသမီးလား ဆိုတာ ဘာမှကို ခွဲခြား စဉ်းစား နေစရာမလိုကြပါဘူး။ “ အူဝဲ ” ဆိုတဲ့ အသံတစ်ခုဟာ မိဘတို့အပေါ် တစ်ချက်လွှတ် အာဏာတည်တဲ့၊ ဩဇာပြည့်၊ အာဏာပြည့်၊ ပါဝါ အပြည့်ပါတဲ့ အမိန့်တစ်ခုလိုဖြစ်ခဲ့ကြ သူချည်းပါပဲ။
ဒီအသံကြားလိုက်တယ်ဆိုရင် မိဘတိုင်းက “ မရှိလို့၊ မပြည့်စုံလို့၊ မအားလပ်သေးလို့” စတဲ့ ဘယ်လို ဆင်ခြေဆင်လက်မှ ပေးမနေကြသလို ညဥ့်နက်သန်းခေါင် အချိန်မျိုးမှာ ဖြစ်စေဦးတော့ “ အအိပ်ပျက်တယ်တွေ၊ စိတ်ပျက်တယ်တွေ” ဘာမှ ညည်းညူ မနေကြဘဲ အခြေအနေကိုကြည့်ပြီး ဆာပုံပေါ်ရင် နို့တိုက်၊ ချမ်းပုံပေါ်ရင် ထွေးလိုက်၊ ပူအိုက်ပုံပေါ်ရင် ယပ်ခတ်၊ အိပ်ချင်ပုံပေါ်ရင် ပုခက်မှာလွှဲ၊ မှတ်၊ ခြင်၊ ယင် ကိုက်ပုံပေါ်ရင် ဖုံးကာဆိုတဲ့ တာဝန်တွေကို ပျာပျာသလဲ လုပ်ဆောင်ပေးခဲ့ ကြတာချည်းပါပဲ။
ဖြည်းဖြည်းလေး ပြန်စဉ်းစား ကြည့်ပါ။ မိမိတို့ဘဝရဲ့ အရုဏ်ဆည်းဆာမှာ ရောင်စုံတိမ်ပန်းတို့နဲ့ လှပသာယာအောင် ဘယ်သူက ဆေးရောင်
ခြယ်ပေး ခဲ့သလဲဆိုတာ သဘောပေါက်လာမှာပါ။ အဲဒီအလှရောင်စုံတွေဟာ မိဘတို့ရဲ့ မေတ္တာစုတ်တံ နဲ့ ခြယ်မှုန်းခဲ့ကြလို့ပဲ မဟုတ်လား။
ပဋ္ဌာန်းပစ္စည်းနဲ့ ပြောရမယ်ဆိုရင်တော့ မိဘဆိုတဲ့ ပုရေဇာတပစ္စည်းတို့ မေတ္တာအပြည့်နဲ့ အားကောင်းခဲ့ကြလို့ဆိုတာ လူတိုင်း သဘောပေါက်ကြမှာပါ။
နေ့တစ်နေ့မှာ အရုဏ်ဆည်းဆာ လှပမှ နေသာနိုင်သလိုပါပဲ။ ဘဝရဲ့ အရုဏ်ဆည်းဆာမှာ မိဘတို့ရဲ့ ပုရေဇာတပစ္စယသတ္တိ များနဲ့ ပြည့်စုံ ကြွယ်ဝ လှပခဲ့ကြလို့လည်း ပညာသင်ကြရမယ့် အချိန်မှာလည်း မချို့မတဲ့ သာယာလှပကြရပြီး အခုလို ဘဝရဲ့နေသာချိန် ကာလတွေမှာ အသက်မွေးမှုတစ်ခု ပညာကိုယ်စီ ပါနိုင်အောင် ပြည့်စုံသာယာလှပ နေကြတာပဲ မဟုတ်လား။ ဒီနေ့ ငါလူလားမြောက်နေတာ၊ လူရာဝင် နေတာတွေဟာ မိဘနဲ့ဆရာသမား ဆိုတဲ့ ပုရေဇာတပစ္စည်း စွမ်းအားတွေက အဓိက အခန်းက ပါဝင်ခဲ့ကြ လို့ဆိုတာကို သဘောပေါက် လောက်ပါတယ်။
အခု ဒီနေ့ ဒီနေရာမှာ အပူဇော်ခံများအဖြစ် ပင့်ဖိတ်ထားကြတဲ့ မိဘတွေ၊ ဆရာသမားတွေ၊ သက်ကြီး ရွယ်အိုတွေဆိုတဲ့ ပုဂ္ဂိုလ်တွေကတော့ ဘဝရဲ့နေညိုဆည်းဆာ အရွယ်ရောက် နေကြတဲ့ ပုဂ္ဂိုလ်တွေပါ။
သူတို့တွေ အားလုံးဟာ အခု ပူဇော်ပွဲကို ကမကထ ပြုကြသူတွေ၊ ပူဇော်ကြသူတွေရဲ့ အရုဏ်ဆည်းဆာကို အလှဆင်ပေး ခဲ့ကြတဲ့ ကျေးဇူးရှင် ပုရေဇာတပစ္စည်းများပဲ ဖြစ်ကြပါတယ်။
ကိုယ့်ဘဝရဲ့ အရုဏ်ဆည်းဆာကို အလှဆင်ဖို့ တာဝန်ကျေခဲ့ကြတဲ့ ပုဂ္ဂိုလ်များရဲ့ နေညိုဆည်းဆာကို အရုဏ်ဆည်းဆာထက် သာလွန်လှပ အောင် အလှဆင်ကြရမှာက သား သမီးတွေ၊ တပည့်တွေ၊ လူငယ် လူရွယ်တွေဆိုတဲ့ ပစ္ဆာဇာတပစ္စည်းများရဲ့ အလှည့်ပါပဲ။
ဒီလို သူ့အလှည့်၊ ကိုယ့်အလှည့်၊ သူ့တာဝန်၊ ကိုယ့်တာဝန်တွေ ကိုယ် စီရှိကြတဲ့အတိုင်း ရှိတဲ့တာဝန်ကိုသိ၊ သိတဲ့အတိုင်းလည်း တာဝန်ကျေအောင် ဆောင်ရွက်ဖော်ရကြတဲ့ ဒီပူဇော်ပွဲကြီးဟာ “သက်ကြီးပူဇော်ပွဲ ကြီး” လို့ ခေါ်ဆိုနိုင်သလို ပဋ္ဌာန်း ပစ္စည်းဆက်သွယ်နည်းအရစပြောရ မယ်ဆိုရင်တော့ “ပစ္ဆာဇာတပစ္စယ သတ္တိအစွမ်းပြပွဲကြီး” လို့လည်း ဆိုနိုင်ကြပါတယ်။
ကျေးဇူးခံ ကျေးဇူးစားတို့ အခုလို တာဝန်ကျေကြတာကို “ ကတညုတ ကတဝေဒီ (ပြုဖူးတဲ့ ကျေးဇူးကိုသိရှိ ပေးဆပ်ခြင်း) မင်္ဂလာ ဖြစ်တယ်လို့လည်း ဘုရားရှင်က ချီးကျူး မှတ်ချက်ပြုတော်မူခဲ့ပါတယ်။
အမှန်ကတော့ အခုပြုလုပ်တဲ့ ပူဇော်ပွဲဟာ မိမိတို့ရဲ့ရှေးက ပုရေဇာတ ပစ္စည်းသဘောမျိုးနဲ့ ကျေးဇူးပြုပေးခဲ့ သူတို့ကို ထောက်ဆ လိုက်ရင် မိမိတို့က ပစ္ဆာဇာတပစ္စယသတ္တိနဲ့ ကျေးဇူး တုံ့ပြန်ပြုပေးတယ်လို့ ဆိုနိုင်သလို မိမိတို့ရဲ့ နောင်လာ နောက်သားများ အတွက်လည်း ပုရေဇာတပစ္စယ သတ္တိအသစ်တစ်ခု ထပ်မံပြုလုပ်ပေး ခြင်းလည်းမည်ပါတယ်။ ဘာကြောင့် လဲဆိုတော့ ဒီနေ့ပြခဲ့တဲ့ စံနမူနာ ကောင်းသည်ပင် နောင်လာ နောင်သားတို့ အတွက် အားကျလိုက်နာဖွယ်ရာ မီးရှူးတန်ဆောင် သဖွယ် ဖြစ်နေလို့ပါပဲ။
ဒါကြောင့် ဒီပွဲကြီးဟာ သက်ကြီးရွယ်အိုတို့ရဲ့ နေညို ဆည်းဆာကို အလှဆင်ပေးတဲ့ပွဲ ဖြစ်သလို မိမိတို့ကိုယ်တိုင်လည်း နောင်တစ်ချိန်မှာ မုချရောက် ရှိကြုံတွေ့ရမယ့် နေညိုဆည်းဆာအတွက် ကြိုတင်အလှပြင်တဲ့ပွဲလို့ဆိုရင်လည်း မှားနိုင်စရာ မရှိပါဘူး။ သူတစ်ပါး အကျိုးဆောင်ခြင်း သည်ပင် ကိုယ့် အကျိုးအတွက် အောင်ရာအောင် ကြောင်းဖြစ်တယ်ဆိုတာ ဒီသဘော မျိုးကိုပြောတာပဲ ဖြစ်တယ်ထင်ပါတယ်။
မှန်ပါတယ်။ မိမိတို့ကိုယ်တိုင် ပစ္ဆာဇာတပစ္စယသတ္တိအစွမ်းပြရမယ့် အလှည့်မှာ စံနာမူနာကောင်းများပြနိုင် ကြမှသာ မိမိတို့ကိုယ်တိုင်ပစ္ဆာဇာတ ပစ္စယသတ္တိကောင်းများနဲ့ ကျေးဇူးတုံ့ ပြန်ခြင်းလို ခံကြရမှာပါ။ မိမိတို့က ဆိုးဝါးတဲ့ ပစ္ဆာဇာတ ပစ္စယသတ္တိများ ကို ပြမိခဲ့ရင်တော့ မိမိတို့ အလှည့် ရောက်တဲ့ အခါမှာလည်း နောင်လာ နောက်သားများက ပိုမိုဆိုးဝါးတဲ့သတ္တိ များနဲ့ တုံ့ပြန်ခြင်းကိုခံရမှာ မလွဲပါဘူး။
စောစောကပြောခဲ့တဲ့အတိုင်း ဒီ ခန္ဓာကိုယ်ကြီးမှာ ပစ္ဆာဇာတပစ္စည်း များဖြစ်တဲ့ နာမ်တရားတို့ ဆက်လက် ဖြစ်ပေါ်မှုမရှိခဲ့ရင် ပုရေဇာတပစ္စည်း ဖြစ်တဲ့ ရုပ်တရားတို့ ဆက်လက်ရှင် သန်ရပ်တည်နိုင်စွမ်းမရှိတော့ဘဲ ဒီခန္ဓာ ကိုယ်ကြီးတစ်ခုလုံးဟာလည်း အသေကောင်ကြီးသက်သက်ပဲ ဖြစ်သွားနိုင် သလိုပါပဲ။ လူ့လောကမှာလည်း နောင်လာနောက်သား ပစ္ဆာဇာတ ပစ္စည်းတွေ တာဝန်ပျက်ကွက်သွား ပြီဆိုရင် စိတ်ဓာတ်၊ သတ္တိ၊ ကျေးဇူး သစ္စာနဲ့ ယဉ်ကျေးမှုများ မြင့်မားတိုး တက်တယ်ဆိုတဲ့ လူ့ဂုဏ်ပုဒ် တွေလည်း အကုန်လုံးပျက်စီးသွားနိုင်တဲ့အတွက် သုဂတိ လူ့ဘုံလူ့ဘဝ ဆိုတာဟာလည်း ကျောက်ဖြစ်ရုပ်ကြွင်းများသဖွယ် ပြောစရာသာရှိပြီ ဖြစ်တည် နိုင်မှုမရှိတော့တဲ့ အသေကောင်များအဖြစ် ရောက်သွားနိုင်ပါတယ်။ စိတ်ဓာတ်မြင့်မားမှု၊ သူရသတ္တိကြီးမားမှု၊ ကျေးဇူးသစ္စာကြီးမားမှု၊ ယဉ်ကျေး လိမ္မာမှုတို့ဆိုတာပြောစရာသာရှိပြီး လက်တွေ့ပြယုဂ်ကင်းမဲ့သွားပြီဆိုရင် အဲဒီ အချိန်မှာ သုဂတိလူသားဆို တာဟာလည်း အသေကောင်ကြီး များနဲ့ ဘာမှထူးခြားတော့မှာ မဟုတ်ပါဘူး။
ဒီနေရာမှာ မိမိတို့ရဲ့ ပစ္ဆာဇာတ ပစ္စယသတ္တိ အကောင်းအဆိုးသည်ပင် နောင်လာနောက်သားတို့အတွက် စံနမူနာဖြစ်တယ် ဆိုတဲ့အချက်နဲ့ ပတ်သက်လို့ ကြားဖူးဖတ်ဖူးခဲ့တဲ့ ဂျပန် ပုံပြင်ကလေးတစ်ခုလိုလည်း သတိရမိပါတယ်။
ရှေးခေတ်က ဂျပန်ပြည်မှာ စားဝတ်နေရေး ရှာဖွေစားသောက်ရတာ အလွန်ကိုခက်ခဲသတဲ့။ တစ်ယောက်လုပ် တစ်ဝမ်းစာရဖို့ တောင်မနည်း ကြိုးစား လုပ်ကိုင်စားသောက်ကြရတာဆိုတော့ မိသားစုထဲမှာ လူအိုလူပိုတွေကိုတင်ပြီး ကျွေးမထားနိုင်ကြဘူးတဲ့။ ဒီတော့ အိမ်မှာမလုပ်နိုင်မကိုင် နိုင်တဲ့ မိအိုဘအိုတွေရှိလာပြီဆိုရင် သားတွေက ပုတ်တောင်းကြီးတွေ ရက်ကြတယ်။ ပြီးတော့မှ မိအိုဘအို တွေလို ပုတ်တောင်းနဲ့ထည့်ပြီး မြစ် ထဲမျှောကြသ တဲ့။ မြစ်ရဲ့အဆုံး ပင်လယ်ဝက ကျွန်းကြီးတစ်ကျွန်း ရောက်သွားတဲ့ အခါမှာတော့ ဒီကျွန်းပေါ်မှာ ရှင်ဘုရင်တို့၊ ပစ္စည်းဥစ္စာ ကြွယ်ဝသူတို့က တာဝန်ပေး ထားသူ တို့က ဒီပုတ်တောင်းကြီးတွေကို ဆယ်ယူပြီး လူအိုတွေကို ကျွေးမွေးစောင့်ရှောက်ကြတာတဲ့။
တစ်ခါတော့ လူရွယ် တစ်ယောက်က သူ့အဖေအိုကြီးကို မျှောဖို့ပုတ်တောင်းကြီး ရက်နေသတဲ့။ သူ့မှာ ရှစ်နှစ်ကိုးနှစ်အရွယ် သားကလေး တစ်ယောက် လည်း ရှိသတဲ့။ အဲဒီလူ ပုတ်တောင်းရက်နေရာကို သားကလေးရောက်လာပြီး “ အဖေ- ဘာလုပ်နေ တာလဲ” လို့ မေးသတဲ့၊ “ပုတ်ရက်နေတာကွ” ဆိုတော့ “ဘာလုပ်ဖို့လဲ” လို့ ဆက်မေးသတဲ့။ “ မင်းအဘိုးက အိုပြီလေကွာ ဘာမှ မလုပ်နိုင်တော့ဘူး။ အဖေလည်း သူ့အတွက် ရှာမကျွေးနိုင်တော့လို့ မင်း အဘိုးကို ဒီပုတ်ကြီးထဲထည့်ပြီး မြစ် ထဲမျှောမလို့ကွ။ ဟိုး-ပင်လယ်ဝမှာ “ မပြန်ကျွန်း” ဆိုတဲ့ ကျွန်းကြီးရှိတယ်။ အဲဒီရောက်တဲ့အခါ တတ်နိုင်တဲ့ လူတွေက မင်းအဘိုးကို ဆယ်ယူ ပြီးကျွေးမွေးကြမှာပေါ့” ဆိုတော့ သားလေးက ခဏငြိမ်ပြီးစဉ်းစားနေသတဲ့။ ပြီးတော့မှ “ အဖေ...ဒီလိုဆို ရင် ပုတ်နှစ်လုံး ရက်ထားပါ” လို့ တိုက်တွန်းသတဲ့။ “ ဟ...မင်းအဘိုးက တစ်ယောက်ပဲရှိတာ ပုတ်တစ်လုံးဆို လုံလောက်ပြီပဲကွ၊ နောက်ထပ် တစ်လုံးက ဘာလုပ်ဖို့ရက်ရမှာလဲ” ဆိုတော့ “ မဟုတ်ဘူးလေ...အဖေ့ အလှည့်ကျတော့သားက ပုတ်မရက်တတ်ဘူး။ ဒါကြောင့် ခုကတည်းက တစ်လုံးပိုရက် ထားပါလို့ပြောတာ” လို့ ပြန်ပြောလိုက်သတဲ့။
အဲဒါပါပဲ။ မိမိတို့ရဲ့ ပစ္ဆာဇာတ ပစ္စယသတ္တိဟာ နောင်လာနောက် သားများအတွက် အတုယူရမယ် စံနမူနာသစ်ဖြစ်သွားလို့ နောင်လာ နောက်သား တို့ရဲ့ ပုရေဇာတပစ္စယ သဘောပဲဆောင်သွားပါလိမ့်မယ်။ အဲဒါ သိပ်အရေးကြီးပါတယ်။ တကယ်လို့ မိမိတို့ အနေနဲ့ ပစ္ဆာဇာတ ပစ္စယသတ္တိကောင်းများ ကို မပြုနိုင် ကြဘူးဆိုရင်တော့ ရွေးချယ်စရာသုံးခု ပဲရှိပါတယ်။ ပုတ်တစ်လုံး အပိုရက် ထားမလား။ ခုကတည်းကရေကူး လေ့ကျင့်ထားကြမလား။ ဒီအတိုင်း စုံးစုံးမြုပ်ကြမလား။ ဒီသုံးမျိုးကလွဲလို့ ရွေးချယ် စရာ မရှိနိုင်တော့ပါဘူး။
ဒါကတော့ ပစ္ဆာဇာတပစ္စယ သတ္တိ ဆိုးပြသူတွေအတွက် ပြောတာပါ။ ဒီနေ့ဒီပွဲမှာ ဆင်နွှဲကြတဲ့ လူငယ် လူရွယ်များ အနေနဲ့ကတော့ ပစ္ဆာဇာတ သတ္တိကောင်းကို ပြကြသူတွေဖြစ်လို့ ဒီသုံးမျိုးအတွက် တွေးတောပူပင်စရာ အကြောင်းမရှိပါဘူး။ မိမိတို့ရဲ့ ပုရေဇာတ မိဘ၊ ဆရာသမား၊ ဘိုး ဘွားတို့ ရဲ့ နေညိုဆည်းဆာကို လှပစေကြသူများပီပီ မိမိတို့ကိုယ်တိုင်ကြုံ တွေ့ရမယ့် နေညိုဆည်းဆာများဟာလည်း တိမ်ပန်းတွေနဲ့ ဝေဆာလှပနေ ကြမှာ မလွဲပါပဲ။
တစ်နေ့တာရဲ့ အလှနှစ်ချိန်ထဲမှာ ညနေဆည်းဆာဟာ အရုဏ်ဆည်း ဆာထက် ကိုယ်တိုင်လည်း အလှပို သလိုထိတွေ့တဲ့ အရာဝတ္ထုတွေ အပေါ်မှာလည်း အလှကူးစေတယ်ဆိုတဲ့ အချက်ကလေးကိုရော အလေးအနက်သတိပြုမိကြသလားပဲ။ ဒါကလည်း တကယ်ကို အလေးထားရမယ့် အချက်ပါ။ ဟုတ်ပါတယ်။ ဘဝရဲ့အလှ နှစ်ချိန်မှာလည်း သက်ကြီးရွယ်အိုခေါ်တဲ့ နေညိုဆည်းဆာ၊ ငယ်ရွယ်နုပျိုတဲ့ အရုဏ်ဆည်းဆာထက် အဆရာထောင်မက အလှ ပိုတာကိုတွေးကြည့်ရင် သိပ်ပြီး သိသာပါတယ်။
“ကလေးသူငယ်ချစ်စဖွယ်” ဆိုတဲ့ အရုဏ်ဆည်းဆာက နုပျိုခြင်း၊ လန်းဆန်းခြင်း၊ မျှော်လင့်ချက် ရောင်ခြည်တို့ရဲ့ ရှေ့ပြေးပုဗ္ဗနိမိတ်ကောင်းဖြစ်ခြင်း ဆိုတဲ့ အလှအပသက် သက်ကြောင့် ချစ်စရာကောင်းရုံလောက်သာ လှပတာပါ။
နေညိုဆည်းဆာဖြစ်တဲ့ သက်ကြီးရွယ်အိုတို့ရဲ့အလှက သူတို့ဘဝနဲ့ ရင်းနှီးရယူသိုလှောင်ထားတဲ့ အတွေ့ အကြုံတွေ၊ အသိဉာဏ်ဗဟုသုတတွေ ၊ ရှောင်စရာဆောင်စရာသင်ခန်းစာတွေအပြင် “သဒ္ဓါ ” အစရှိတဲ့ သုံးအားများနဲ့ ကြိုးစားအားထုတ် ထားတဲ့ ဒါန၊ သီလ၊ ဘာဝနာ၊ တရားရတနာတွေနဲ့ ပါ ပြည့်စုံကြွယ်ဝလှတာမို့ “ကြည့်မဝ” အလှမျိုးထက် အဆရာထောင်မက သာလွန်လှပတဲ့ “ပြည့်ဝ” အလှ ပိုင်ရှင်တွေ ဖြစ်လာကြလို့ တကယ့်ကို မှကြွဝလှပတဲ့ အိုကြွယ် အလှပိုင်ရှင်တွေလို့ ဆိုရမှာပါ။
အလှကြည့်ဖို့သာမက ဘဝဖြည့်ဖို့ပါ အားကိုးရတဲ့ အလှသူကြွယ်တွေလည်း ဖြစ်ပါတယ်။ မှန်ပါတယ်- ဒီနေ့ ခေတ်မီတိုးတက်တဲ့ ပညာရပ်တွေ၊ ဆန်းသစ်တီထွင် အောင်မြင်မှုတွေနဲ့ ပြည့်စုံ ကြွယ်ဝနေကြတယ် ဆိုတာ ဟာ ရှေးရှေးက ပုရေဇာတပစ္စည်းကြီးများရဲ့ ဘဝပြည့်အောင် လေ့လာ ဆည်းပူးခဲ့တဲ့ အမွေအနှစ်တွေကို လက်ခံရယူ အားဖြည့်ပြီး တော့မှ ဆက်လက်တီထွင် ကြံဆကြိုးစားခဲ့ကြတာတွေချည်း မဟုတ်ပါလား။ “အိုကြွယ်” တွေကို “ အိုပယ်” အဖြစ် ပစ်မထား ကြဘဲ သူတို့နဲ့ ထိတွေ့ခွင့်ရအောင် အလေးအနက်ထားကြမယ်ဆိုရင် နေညိုဆည်းဆာရဲ့အလှလိုပဲ ထိတွေ့တဲ့ လူတိုင်းကို အလှတွေ ကူးစက်ပြီး ဘဝကိုပိုလို့ ပြည့်စုံစေမှာမလွဲပါဘူး။
ငယ်ငယ်တုန်းက ဖတ်ရဖူးတဲ့ စာတစ်ပုဒ်မှာ “ခေါင်းတစ်လုံးနဲ့ စဉ်းစားလို့ မရနိုင်တဲ့ ပြဿနာကြုံလာရင် ခေါင်းသုံးလုံးနဲ့ လူကိုရှာပြီး ဆည်းကပ် မေးမြန်းပါ” ဆိုတဲ့ နီတိစကား အတိုင်း ပြဿနာ အခက်အခဲနဲ့ကြုံရ တဲ့အခါ ခေါင်းသုံးလုံးနဲ့လူကို လှည့် လည်ပြီးရှာရတယ်။
တစ်နေရာမှာ အလွန်အိုမင်းနေပြီဖြစ်တဲ့ အဘိုးအို တစ်ဦးထိုင်နေတဲ့အခါ သူ့ရဲ့ခါးက အတော်ကြီးကို ညွတ်ကိုင်းနေတဲ့ အတွက် ဦးခေါင်း ကထောင်နေတဲ့ ဒူးနှစ်လုံးကြားမှာရောက်နေတော့ အဝေးကမြင်လိုက်ရတဲ့အခါ ခေါင်းသုံးလုံးနဲ့လူလို့ ထင်ရတယ်။ ဒါနဲ့ သူ့အနားချဉ်းကပ်ပြီး ပြဿနာ ကို စပြောပြလိုက်တော့ အဘိုးအိုက ပြဿနာကိုမဆိုင်းမတွဘဲ အဖြေပေး လိုက်သတဲ့။ ဒါဟာ ဘဝ နေညို ဆည်းဆာတို့ဆီက ထိတွေ့ရယူတဲ့ အလှတရားပဲမဟုတ်လား။
ဒါကြောင့် အြွိုကယ်အလှသူဌေးတွေကို အိုပယ်တွေဖြစ်အောင် ပစ်မထားကြဘဲ အခုလို ထိတွေ့ပူဇော်ကြတာဟာ သူတို့ဆီကြွယ်ဝတဲ့ အလှ တရားတွေကိုလည်း ထိတွေ့ကူးယူတဲ့သဘောဖြစ်လို့ ဒီနေ့ပြုလုပ်တဲ့ပွဲကို “ အလှကူးပွဲ”လို့လည်း ဆိုနိုင်မယ် ထင်ပါတယ်။
ပူရေဇာတလူကြီးများ နဲ့ ပစ္ဆာဇာတလူငယ်တို့ တာဝန်ကိုယ်စီ ကျေပွန်ထိတွေ့ကြပြီး အလှချင်း ကူးလူးယှက်နွှယ် အလှကြွယ်ကြပါ စေလို့ ဆုတောင်းရင်းနိဂုံးချုပ်ပါတယ်။ ဆည်းဆာတိုင်းလှပကြပါ စေဆိုပြီး အနုမောဒနာစကားကို အဆုံးသတ် ခဲ့ပါတယ်။
အနုမောဒနာစကားပြောပြီးတဲ့ အခါမှာ အပူဇော်ခံအဘိုးအဘွားတွေ အားလုံးကိုတစ်ဦးချင်းဆီ အရောက် သွားပြီးတော့လည်း“ ဆည်းဆာတိုင်း လှပကြပါစေ” လို့ ဆုတောင်းနှုတ်ဆက်တဲ့အခါ လူမျိုးစုံ၊ ဘာသာစုံ အားလုံးကလည်း ဝမ်းပန်းတသာ ပြန်လည် နှုတ်ဆက်ကြပါတယ်။
အဲဒီညက သင်တန်းသားထက် ဝက်ကျော်က သက်ကြီးပူဇော်ပွဲ ရောက်နေကြလို့ ပဋ္ဌာန်းသင်တန်းကို နောက်ကျပြီး ပြုလုပ်ရတဲ့ အတွက် ည ၉ နာရီခွဲလောက်မှ ပြီးဆုံးပါတယ်။ သင်တန်းပြီးချိန်မှာ သက်ကြီးပူဇော်ပွဲ ကမကထပြုလုပ်တဲ့ လူငယ်တစ်ဦး ရောက်လာပြီး ဒီပူဇော်ပွဲကို မြန်မာ ပြည်မှာ မြန်မာ စာ အဓိကနဲ့ မဟာဝိဇ္ဇာ ဘွဲ့ရခဲ့ပြီး ဆစ်ဒနီတက္ကသိုလ်မှာ အလုပ်လုပ်နေတဲ့ ဂျပန်အမျိုးသမီး တစ်ဦးလည်း တက်ရောက်တယ်။ သူကမြန်မာစကားကို ကောင်းကောင်း နားလည်ပါတယ်။
“ဒီပွဲမှာ ပြောသွားခဲ့တဲ့ တစ်နေ့တာ အလှနှစ်ချိန်နဲ့ တစ်ဘဝရဲ့အလှ နှစ်ချိန်ဆိုတာကို အခုမှကြားဖူးရလို့ ဝမ်းသာတယ်။ ပြန်တဲ့အခါ သက်ကြီး ရွယ်အိုများဆီသွားပြီး တစ်ဦးချင်းဆီကို တလေးတစား နှုတ်ဆက်တာ တွေ့ရတာကလည်း တကယ့်ကို မြန်မာ့အလှစစ်စစ်ကို မြင်ရတာဖြစ်လို့ ကြည်နူးလို့ မဆုံးပါဘူးတဲ့။ ဒီနေ့ကျင်းပတဲ့ပွဲနဲ့ ဒီနေ့ပြော ခဲ့တဲ့ အကြောင်းအရာများကို ဂျပန် ဘာသာနဲ့ ပြန်ရေးပြီး ဂျပန်တို့ကိုလည်း လက်ဆင့်ကမ်း လိုပါတယ်၊ ခွင့်ပြုပါ” ဆိုပြီး ခွင့်တောင်းပါတယ်။
မိမိက “တတ်သမျှဘာသာ စကားနဲ့ ကြိုက်သလိုဖြန့်ဝေပေးပါ၊ ခွင့်လည်းပြုပါတယ်။ တစ်ကမ္ဘာလုံးမှာရှိတဲ့ လူသားဆည်းဆာ တွေ လှပနေရင် သုဂတိလူ့ဘုံဆိုတဲ့ ဂုဏ်ပုဒ်ကလည်းပိုပြီး အဓိပ္ပာယ်ရှိတာပေါ့” ဆိုတဲ့ အကြောင်းပြန်ပြောလိုက်ပါတယ်။
ဆည်းဆာတိုင်း လှပကြပါစေ။
အိုခြင်းရဲ့အလှတရားများကို ရှာဖွေခံစားတတ်ကြပါစေ။
ဓမ္မဘေရီအရှင်ဝီရိယ(တောင်စွန်း)
