ကောင်းကင်ထက်မြင့်သော

 ကောင်းကင်ထက်မြင့်သော

ညသည် တဖြည်းဖြည်းနှင့် အိုမင်းလာသည့် ကောင်းကင်ထက်တွင် လမင်းဝိုင်းပြည့်ပြည့်

ပွင့်လန်းထိန်ညီးနေသော်ငြား နီယွန်ရောင်စုံမီးတို့ စုံညီနေသော ပတ်ဝန်းကျင်ကြောင့်
လရောင်ကို ပြည့်ဝစွာ မခံစားနိုင်ခဲ့….။ တန်ဆောင်မုန်းလပြည့်ည ဆိုတာကို အမှတ်ရမိ သည့်အခိုက် မီးရောင် ပြောက်တိပြောက်ကျားသာ တွေ့ရတတ်သော ဇာတိမြို့ကို ရုတ်တရက် လွမ်းလာသည်။ လွန်ခဲ့သော ဆယ်စုနှစ် သုံးခုကျော်က သူမမိခင်သည် ယခုလို တန်ဆောင်မုန်းလတွင်ပဲ မကြာမီ ရက်အနည်းငယ်တွင်း လူ့လောကတွင်း ၀င်ရောက်လာမည့် သူမကို ရင်တွင်း လွယ်ထားခိုက် လရောင်ဖမ်းစားမှုကို ပြည့်ပြည့်၀၀ ခံစားနေချင်နေလိမ့်မည်…။

သူမကကော…. ဘေးတွင် အပြစ်ကင်းစင်စွာ အိပ်မောကျနေသော သမီးငယ်လေး၏ ပါးပြင်အိအိလေးကို ငုံ့နမ်းရင်း သူမ မိခင်ကို ပြင်းပြင်းပြပြ လွမ်းဆွတ်လာသည်။ အမေ အခုချိန်ဆို ဘာတွေလုပ်နေမလဲ … အိပ်ရာဝင် နောက်ကျတတ်သော အမေသည် သူနှစ်ခြိုက်သော ကိုရီးယားကား စောင့်ကြည်နေနိုင်သည်… ဒါမှမဟုတ် တစ်နေတာ ကုန်ကျမှု စာရင်းများ မှတ်နေမလား. ..။


ခုချိန်ဆို ရန်ကုန်မှာ ၁၀ နာရီသာသာပဲ ရှိဦးမည်။ တိုးတက်နေသော မြို့ပြလူနေမှုစနစ်ကို လိုက်မီအောင် နေ့စဉ် လှုပ်ရှားရုန်းကန်ရင်း တစ်ဦးတည်းသော သမီးငယ်လေးကို ထိန်းကျောင်းရသည့်အခါ “အမေ ငါတို့ မောင်နှမ ခြောက်ယောက်ကို ဘယ်လို လူလားမြောက်အောင် ထိန်းကျောင်းခဲ့ရသလဲ.. တစ်ယောက်တည်းတောင် ဒီလောက် ဖတ်ဖတ်မောတာ သူဘယ်လို ခန့်ခွဲခဲ့သလဲ မသိဘူး” ဆိုသော မေးခွန်းက ခေါင်းထဲတွင် အခါခါ ပေါ်လာသည်။

သူမအတွက် သူမမိခင်သည် အများနှင့်မတူ စံပြမိခင်ဖြစ်သည်။ သူမ မိခင်သည် ပြောစမှတ် ပြုလောက်အောင် ချောမောလှပသူ ဖြစ်သည့်အပြင် အိမ်ထောင်စီမံခန့်ခွဲ ထိန်းသိမ်းရာတွင်လည်း စေ့စပ်သေချာသူ တစ်ယောက်ဖြစ်လေသည်။ ခင်ပွန်းသည်၏ ၀န်ထမ်းလစာနှင့် သားသမီးခြောက်ယောက်ကို အပူအပင်မဲ့ မကြောင့်မကြ နေနိုင်အောင် ထိန်းသိမ်းကွပ်ကဲနိုင်သူ ဖြစ်လေသည်။ “စီးတဲ့ရေ ဆည်တဲ့ကန်သင်းဆိုတဲ့ စကားအတိုင်း အ်ိမ်ထောင်ရှင် မိန်းမက အိမ်ထောင်တစ်ခုမှာ အဓိကပဲ။ မိန်းမက မကွပ်ကဲနိုင်ရင် သွားရောပဲ” ဟု ဆိုတတ်လေသည်။

အမေသည် အဖေ၏ ဆိုရှယ်လစ်ခေတ် ၀န်ထမ်းလစာနှင့် အိမ်ထောင်ထိန်သိမ်းခဲ့ရုံသာမက လက်ဝတ်လက်စားများကိုပင် ၀ယ်ယူဝတ်ဆင်နိုင်အောင် အစုအဆောင်း တော်ခဲ့သူဖြစ်သည်။ “ဒီနားကပ်ကလေးရအောင် ဈေးဖိုးထဲက ကျန်တာလေးတွေ စုပြီး ၀ယ်ခဲ့တာ” ဟု သူမ နားမှ စိန်ခြယ် နားကပ်လေးကို ကိုင်ကာ ဂုဏ်ယူတတ်သည်။

အမေသည် သနပ်ခါးကို အလွန်ကြိုက်နှစ်သက်သူ ဖြစ်သည်။ နံနက်ခင်း မျက်နှာသစ်ပြီးသည်နှင့် ဘယ်လောက် အလုပ်များများ မျက်နှာကို သနပ်ခါးပွတ်လိုက်ရမှ ကျေနပ်သည်။ ဆောင်းတွင်းဆိူလျှင်တောင်မှ အလှဆီခံကာ သနပ်ခါးလိမ်းတတ်သူ ဖြစ်သည်။ အမေ့အပါးကပ်သွားသည်နှင့် နံသာဖြူသင်းသင်းက အရင်ကြိုနှင့် နေတတ်သည်။ သူမတို့ ညီအမ မျက်နှာသစ်ပြီး မျက်နှာပြောင်နှင့် ထွက်လာလျှင် “ငါတို့နိုင်ငံရာသီဥတုက သနပ်ခါးနဲ့ အလိုက်ဆုံးပဲ.. သနပ်ခါး သွားလိမ်းကြလေ” ဟု မလိမ်းမချင်း တတွတ်တွတ် တိုက်တွန်းနေတတ်သည်။

နဂိုအခံကလည်း လှပသူဖြစ်သည့်အပြင် အလှကြိုက်တတ်သူ ဖြစ်သောကြောင့် အမြဲတမ်း ပြင်ပြင်ဆင်ဆင် နေတတ်သူလည်း ဖြစ်ပြန်သည်။ အမေနှင့် သူမတို့ ညီအမနှစ်ယောက် ဖီးလိမ်းပြင်ဆင်ကာ အပြင်သွားတိုင်း မြင်သူတိုင်းက “သမီးတွေက အမေ့ကို မမီဘူးနော်” ဟု ချီးကျုးလျှင် အမြဲတမ်း တပြုံးပြုံးနှင့် ကျေနပ်နေတတ်သည်။

သူမဖခင် တိမ်းပါးသွားချိန်တွင် အမေ့အသက် လေးဆယ်ကျော်ခန့်သာ ရှိသေးသည့်အတွက် လှပနေသေးသည်။ ဖခင်နာမကျန်း ဖြစ်နေစဉ် မနေမနား ပြုစုလိုက်ရသောကြောင့် ကိုယ်ရေစစ်ကာ ယခင်ကထက်တောင် ကြည့်ကောင်းနေခဲ့သောကြောင့် ဆွေမျိုး အသိုင်းအ၀ိုင်းကြားတွင် မုဆိုးမ ငယ်ငယ်ချောချော တစ်ဦးအနေနှင့် လက်ညိုးထိုးစရာ ဖြစ်ခဲ့သော်ငြား အမေသည် သားသမီးခြောက်ယောက်နှင့် ဘ၀ကို တည်တည်တံ့တံ့ ရပ်တည်နိုင်အောင်သာ ရှေးရှုခဲ့သည်။ ကွယ်လွန်သွားသူ ဖခင်ကြီး၏ အမြော်အမြင်ကြီးမားမှု၊ မိခင်၏ စီမံမှုနှင့် အစ်ကိုလတ်၏ ကြိုးပမ်းမှုတို့ကြောင့် သူမတို့ မိသားစုပိုင် စီးပွားရေး လုပ်ငန်းလေးကို တည်ထောင်နိုင်ခဲ့သည်။

အမေသည် သူမတို့ ညီအမနှစ်ယောက်ကို အချက်အပြုတ် အိမ်မှုထိန်းသိမ်းရာတွင် စိတ်ပါဝင်စားအောင် ကြိုးပမ်းနိုင်ခဲ့သည်။ သူမဆိုလျှင် သုံးတန်း၊ လေးတန်း အရွယ်ကတည်းက လက်ပေါ်တွင် ကြက်သွန်တင်ကာ လှီးတတ်နေပြီ။ ဆယ်တန်းအောင်ကတည်းက မီးဖိုထဲဝင်ခိုင်းသည်မှာ အလုပ်ဝင်မှ နားရတော့သည်။

ထိုစဉ်အချိန်တုန်းက “အမေကလည်း ငါ့ကိုခိုင်းလိုက်တာ” ဟု စိတ်ကွက်မိသော်လည်း အိမ်ထောင်ကျပြီး ကိုယ်တိုင် ချက်ပြုတ် အိမ်ထိန်းသိမ်းသည့်အခါမှ အမေ့ကို စိတ်ထဲမှ အကြိမ်ကြိမ် ကျေးဇူးတင်နေမိပြန်သည်။ ဟင်းအတော်များများ ချက်တတ်နေသည်မှာ အမေ့ ကျေးဇူး အများကြီးပါသည်။ စိတ်ပါပါ မပါပါ အတင်းဆွဲခေါ်ကာ “ဒီလောက် ပျင်းနေရင် နင်တို့ ယောက်ျားရရင် ဘယ်လို ချက်ပြုတ်ကျွေးကြမလဲ” ဟု ဟင်းနည်းအသစ်များ သင်ပြပေးတတ်သည်။ ငယ်စဉ်တလျှောက် နာခံခဲ့သော အမေ့ စည်းစနစ်များကြောင့် ယခု သူမ၏ အိမ်ထောင်ဘ၀ သာယာနိုင်ခြင်းဖြစ်သည်။


တခါတရံ အိမ်နောက်ဖေးမီးဖိုမှာ မတ်တပ်ရပ် ဟင်းချက်ခိုက် ကြမ်းပေါ်တွင် ထိုင်ခုံအငယ်လေး ခုထိုင်ကာ အားရပါးရချက်ခဲ့ရသော အိမ်က မီးဖိုကို လွမ်းလာသည်။ ဆောင်းတွင်းနံနက်ခင်းများ ဆိုလျှင် အနွေးထည် ၀တ်လျက် ထမင်းကြော်ရင်း မီးသွေးမီးဖို အောက်တွင် ထိုးထည့်ထားသော ထန်းပင်မြစ်ဖုတ်ကို နှမ်းဆီမွှေးမွှေး ဆားလေးရောပြီး တို့စားရသည့် အရသာကို လွမ်းလာသည်။

ညနေတိုင် အလုပ်မှ အိမ်ပြန်နောက်ကျလျှင် စိုးရိမ်မကင်း မျက်နှာနှင့် ဧည့်ခန်းဝတွင် စောင့်ကြို ဆီးမေးတတ်သော အမေ့မျက်နှာကို မြင်ယောင်လာခိုက် မျက်ရည် ရစ်ဝဲလာတတ်သည်။ အမေသည် တစ်ခြားအမေများလို သူချစ်ကြောင်း ထုတ်ဖော်ပြတတ်သူ မဟုတ်။ ငယ်ငယ်တုန်းက သူမတို့ မောင်နှမတွေ ဖျားနာလျှင် မအိပ်မနေ ပြုစုတတ်သော်ငြား နေကောင်းလာကာ မျောက်ရှုံးအောင် ဆော့လျှင်လည်း ကြိမ်လုံးနှင့် ခပ်ဆတ်ဆတ် ဆော်တတ်သူဖြစ်သည်။

တစ်ခါက အမေနှင့်အတူ အဖေ့ဇာတိ ကျောက်ဆည်ကို ခရီးသွားစဉ်က ဖြစ်သည်။ သူမ ရထားပြတင်းဘောင်ကို မှီကာ ငိုက်ရင်း အိပ်ပျော်သွားခဲ့သည်။ သူမ နိုးလာတော့ ဆောင်းတွင်း ညဖြစ်သော်ငြား ခေါင်းအုံးကဲ့သို့ အိအိနွေးနွေး အရာပေါ်တွင် ခေါင်းတင်လျက်သား ဖြစ်နေသဖြင့် စောင်းငဲ့ကြည့်မိရာ အမေက မအိပ်ဘဲ သူ့လက်ဖ၀ါးနှင့် ခံထားပေးခြင်း ဖြစ်နေသည်။

သူမ နိုးလာတော့လည်း သူ မဟုတ်သည့်အတိုင်း ခပ်တည်တည်ပင် “မာမာ (အမေ) အိပ်တော့မယ် ဟု ပြောကာ မျက်စိမှိတ်ကာ အိပ်ဖို့ ပြင်ဆင်နေတော့သည်။ “ညည်းတို့အမေက ငါ့သားသမီးတွေထဲမှာ မာနအကြီးဆုံးပဲ။ သူ့သားသမီးတွေကိုလည်း အရမ်းချစ်တယ်။ ဒါပေမဲ့ ဘယ်တော့မှ ထုတ်မပြဘူး။ ရင်ထဲမှာပဲ သိမ်းထားတာ“ ဟု သူမ အဘွားက အမြဲပြောတတ်သည်။

မှန်ပါသည်။ အမေသည် သူမချစ်ကြောင်း အမြဲတစေ ထုတ်ဖော်ပြောတတ်သူမဟုတ်ပေ။ ညဘက် အားလုံးအိပ်သွားမှ ခြင်မ၀င်အောင် ခြင်ထောင်လိုက် ဖိပေးတတ်သည်။ သားသမီး အသီးသီး ကြိုက်တတ်သော ဟင်းကို မစားရသေးမှန်း သိလျှင် တသီးတသန့် ဖယ်ထားပေးတတ်သူ ဖြစ်သည်။ သူမအတွက်တော့ အမေ သဘောမတူနိုင်သော ချစ်သူနောက်သို့ (အမေမသိအောင်) လိုက်ရန် စီစဉ်နေဆဲကာလများသည် ဘ၀တွင် အလွန် စိတ်ဆင်းရဲဆုံး ကာလများဖြစ်သည်။

အမေ မရိပ်မိအောင် အလုပ်ကို ခပ်တည်တည် သွားကာ နေ့တဓူဝ ပုံမှန်အတိုင်း လည်ပတ်နေရင်း ကျက်သရေရှိသော အမေ့မျက်နှာကို ခိုးခိုးကြည့်ကာ သက်ပြင်းခိုးရှိုက်ရသည်မှာ အကြိမ်ကြိမ်ပင်။ ညနေ အလုပ်မှ ပြန်လာတိုင်း ကြမ်းပေါ်တွင် ဖျာခင်းကာ အမေလှဲနေခိုက် တူမလေးနှင့် ရောနှောကာ အမေ့ ရင်ခွင်တွင်း တိုးဝင်မိလို့ အမေက ပြန်ဖက်ထားလျှင် သူမ ၀မ်းပန်းတနည်း မငိုမိအောင် ထိန်းချူပ်ရသည်မှာ ခက်ခဲလှသည်။ အမေ့မေတ္တာကို သူမ သေသေချာချာ သဘောပေါက်လာသည်မှာ သမီးကို ကိုယ်ဝန်ဆောင်စဉ်မှ စပါသည်။

သူမက morning sickness ကို ကိုယ်ဝန် ၇ လ အထိ ရခဲ့သူဖြစ်သည်။ ဒါ့အပြင် တိုက်တိုက်ဆိုင်ဆိုင် သမီးသည် သူမကို အမေကိုယ်ဝန်ရှိစဉ်ကလိုပင် ခေါင်းက အောက်သို့မစိုက်ပဲ ရှိနေခဲ့သည်။ “သမီးကိုယ်ဝန်တုန်းက အောက်ကို ခေါင်းမစိုက်ခဲ့လို့ ပြနေကျ ကျန်းမာရေးဆရာမနဲ့ ဆွဲလှည့်ခဲ့ရတာ။ နာလိုက်တာ ပြောမနေနဲ့အေ” ဟု သူမကို ဆိုဆုံးမမရတိုင်း အမေပြောလေ့ရှိတာကို သတိရမိသည်။
သူမက အမေမသိအောင် ယောက်ျားနောက် လိုက်လာခဲ့သည့်အတွက် အစပိုင်းတွင် အမေက စိတ်ဆိုးကာ ပစ်ပယ်ထားခဲ့သည်။

ကိုယ်ဝန်နှင့် အခက်အခဲ ကြုံတိုင်း၊ သူတပါး အကူအညီ လိုအပ်ခိုက် မရတိုင်း “ငါ့အမေသာဆို ဒီလိုလုပ်မှာ မဟုတ်ဘူး” ဟု ၀မ်းပမ်းတနည်း တွေးမိနေတတ်သည်။။ တခါတရံ သူမ အပျိုဘ၀တုန်းက အမေ စိတ်ညစ်မိအောင် လုပ်ခဲ့သည်များကို တွေးမိသည့်အခါ “ အမေတော့.. တော်တော် စိတ်ညစ်ရှာမှာပဲ… သမီးသာ ငါ့လိုလုပ်ရင် ငါဘယ်လို လုပ်ရမလဲ” ဟူသော မေးခွန်းများ ပေါ်လာခဲ့သည် အထိပင်။ ထူးအိမ်သင်၏ အမေ့အိမ်၊ ကြယ်တွေဆုံတဲ့ည သီချင်းများ နားထောင်မိတိုင်း မျက်ရည် ရစ်ဝဲလာမိသည်။

သို့ရာတွင် မိခင်သည် မိခင်သာ ဖြစ်သည်။ သမီးမွေးပြီး သူမအလွန် ပိန်ကျသွားသည်ကို ကြားသိသည်ထင့်။ အမေ့ဆီကို အဝေးမှ သူမ ဖုန်းခေါ်လိုက်တိုင်း စကားလက်ခံပြောကာ လသားအရွယ် သမီးလေး ထိန်းကျောင်းရေးကို လက်ချာပေးတတ်သည်။ သူမ၏ အပူအပင်သောက၊ စိတ်ချမ်းသာမှုများကို ဖုန်းပေါ်မှတဆင့် မျှဝေ ခံစားပေးတတ်သည်။

သမီးလေး သုံးခါလည်ပြီမို့ ဇာတိမြေသို့ ပြန်သည့်အခါ သူမအလွန် လွမ်းဆွတ်နေသော အမေ့အိမ်ကို ပြန်လည် ခြေချခွင့်ရခဲ့သည်။ အမေ့အိမ်ကတော့ အရင်အတိုင်း မပြောင်းမလဲပင်။ အေးမြသော အမေ့အိမ်အရိပ်ကို ခိုနားရသည်မှာ စိတ်ချမ်းသာစရာ။ မစားရတာကြာသော အမေ့လက်ရာ ထမင်းဝိုင်းကလည်း ယခင်ကအတိုင်း စားမြိန်သည်ပင်။ အမေကတော့ သူမစိတ်ကူးထဲတွင် အကြိမ်ကြိမ် ပုံဖော်မိသလို သူမထွက်လာခဲ့စဉ်ကလို မဟုတ်တော့။ အမေ့မျက်နှာတွင် အရေးအကြောင်းတွေ ပိုများလာသလိုပဲ။ ပြီးတော့ အမေ ပိုဝလာသည်။

သူမ ပြန်တဲ့နေ့… အမေကို ဖက်ကာနမ်းရင်း နှုတ်ဆက်တော့ အမေက ထုံးစံအတိုင်း ခရီးလမ်းတွင် ဂရုစိုက်ဖို့၊ သူ့မြေးကို ဂရုစိုက်ဖို့ တတွတ်တွတ် မှာရှာသည်။ ဝေဟင်ပေါ်မှ မြင်ရသည့် ဇာတိမြေကို ငေးကြည့်ရင်း…. အမေ့ရင်ခွင်နှင့် ဝေးရာကို ခေတ္တထွက်သွားရင်း ဘ၀၏ ပြောင်းလဲမှုတွေကို သတိပြုမိသည်။ သြော်…  အမေအသက်ကြီးရှာပြီ။

ရွှေသန့်
by မျက်ရှု သုတ၊ရသမဂ္ဂဇင်း